12 сакавіка, Мінск /Кар. БЕЛТА/. У Мінску завяршыўся фінальны этап рэспубліканскіх спаборніцтваў юных хакеістаў "Залатая шайба" на прызы Прэзідэнта Беларусі ў дывізіёне А ў малодшай узроставай групе (2009-2010 гады нараджэння), паведамляе карэспандэнт БЕЛТА.
Сёння ў вырашальным паядынку за першае месца на лёдзе сталічнай "Чыжоўка-Арэны" сышліся два прадстаўнікі сталіцы - хакеісты "Партызана" з Партызанскага раёна ва ўпартай барацьбе абыгралі з мінімальнай перавагай "Тарнада" з Кастрычніцкага раёна - 1:0.
У гульні за бронзу "Прынёманскія ястрабы" з Кастрычніцкага раёна Гродна разграмілі каманду "Шклоўскія льдзіны" з рэзультатам 13:3. Пятае месца заняў гомельскі "Вымпел", што адолеў "Атлант" з Брэсцкай вобласці - 3:2.
Па выніках вырашальных сустрэч былі названы лепшыя ігракі:
варатар - Аляксандр Котаў ("Партызан");
абаронца - Таццяна Сіцько ("Атлант");
нападаючы - Мікіта Кнышэўскі ("Прынёманскія ястрабы").
У спрэчцы бамбардзіраў перамагла Аляксандра Войтава са "Шклоўскіх льдзін", у актыве якой 12 ачкоў (10 шайбаў і 2 перадачы).
У кваліфікацыйных спаборніцтвах малодшай узроставай групы прынялі ўдзел больш за 800 юных хакеістаў з 73 каманд з усіх рэгіёнаў Беларусі. У дывізіёне А выступалі каманды з гарадоў і раёнаў, дзе ёсць крытыя лядовыя арэны.
На мінулым тыдні пераможцамі спаборніцтваў у старэйшай узроставай групе (2007-2008 гады нараджэння) сталі "Прынёманскія ястрабы", серабро ў "Тарнада", бронзу заваявалі хакеісты "Лакаматыва" з Цэнтральнага раёна Мінска.
Фіналы ў дывізіёне Б адбудуцца з 16 па 18 сакавіка (старэйшая ўзроставая група) і з 23 па 25 сакавіка (малодшая ўзроставая група).
Акрамя спаборніцтваў на лядовых пляцоўках для ўсіх удзельнікаў фінальнай стадыі арганізаваны розныя мерапрыемствы. У прыватнасці, будучыя зоркі хакея наведаюць аквапарк "Лебядзіны".
Турнір "Залатая шайба" ў Беларусі адроджаны па ініцыятыве кіраўніка дзяржавы Аляксандра Лукашэнкі ў 1997 годзе. Арганізуюць спаборніцтвы Міністэрства спорту і турызму, Мінадукацыі, Беларускі рэспубліканскі саюз моладзі, Федэрацыя хакея Беларусі і Прэзідэнцкі спартыўны клуб.-0-
