24 студзеня, Мінск /Кар. БЕЛТА/. Хакеісты мінскага "Дынама" правядуць сёння чарговы паядынак рэгулярнага чэмпіянату КХЛ, паведамляе карэспандэнт БЕЛТА.
Сёння падапечныя Крэйга Вудкрафта згуляюць у Маскве з адным са сваіх канкурэнтаў у барацьбе за выхад у плэй-оф "Спартаком" (пачатак гульні ў 19.30; прамая трансляцыя на тэлеканале "Беларусь 5"). Цяпер "зубры" знаходзяцца на 9-м месцы ў турнірнай табліцы Заходняй канферэнцыі, набраўшы 53 ачкі ў 54 праведзеных сустрэчах, у спартакаўцаў на два балы больш, яны на 7-й пазіцыі. На 8-м радку чарапавецкая "Поўначсталь", якая мае 54 ачкі. У папярэднім матчы мінчане пацярпелі паражэнне ў Чарапаўцы з рэзультатам 1:2.
Таксама сёння адзін з лідараў турніру яраслаўскі "Лакаматыў", які знаходзіцца на трэцяй пазіцыі, прыме на сваёй арэне гасцей з падмаскоўнага "Віцязя", які з 60 ачкамі займае 6-е месца. Наперадзе ўсіх СКА з Санкт-Пецярбурга - 84 ачкі, другім ідзе маскоўскі ЦСКА, у якога на 14 балаў менш.-0-
