11 лютага, Мінск /Кар. БЕЛТА/. Міністр спорту і турызму Сяргей Кавальчук у эфіры праекта БЕЛТА "У тэме" пракаменціраваў рэзультат біятланіста Антона Смольскага, які заваяваў серабро ў алімпійскай індывідуальнай гонцы.
"Поспех Смольскага - гэта ў першую чаргу заслуга самога спартсмена, яго ўпартыя трэніроўкі, характар, мэтанакіраванасць і правільны падыход. Але ў той жа час гэта вынік сістэмнай работы цэлага калектыву - і трэнерскага складу, і змазчыкаў лыжаў, і спецыялістаў Цэнтра алімпійскай падрыхтоўкі. Нельга не адзначыць настаўнікаў на ранняй стадыі кар'еры Антона, якія паставілі яго на лыжы і ўлюбілі ў гэты від спорту, бацькоў, якія падтрымлівалі сына на ўсім яго шляху. І нават балельшчыкі, якія балелі і перажывалі, таксама ўнеслі свой уклад у гэты медаль", - адзначыў міністр.
Сяргей Кавальчук таксама звярнуў увагу на тое, што Гульні ў Пекіне праходзяць у незвычайных умовах, і каранавірусныя абмежаванні аказваюць вялікі ўплыў на якасць трэніровачнага працэсу. "Калі склалася такая сітуацыя, нам неабходна пад яе падстроіцца. Упэўнены, што кітайскія арганізатары робяць усё магчымае і нават немагчымае для таго, каб зберагчы здароўе спартсменаў. Гэта Алімпіяда асаблівая, таму можна смела сказаць, што сярэбраны медаль Антона з залатым адлівам, улічваючы ўсе гэтыя абмежаванні і навакольныя ўмовы".-0-