17 сакавіка, Мінск /Кар. БЕЛТА/. Баранавічы 2-6 красавіка прымуць традыцыйны міжнародны турнір па хакеі на траве сярод жаночых каманд "Кубак "Садружнасць" на прызы Баранавіцкага гарвыканкама, паведамілі БЕЛТА ў прэс-службе Беларускай федэрацыі хакея на траве.
У спаборніцтвах прымуць удзел восем каманд з Беларусі, Расіі і Украіны. Яны будуць падзелены на дзве групы. У групе А згуляюць: "Дынама-Ак Барс" (Казань), зборная Беларусі (U-18), ХК "Мінск", ГХК "Рытм" (Гродна).
У групе В за выхад у наступны раўнд спаборніцтваў паспаборнічаюць зборная Свярдлоўскай вобласці (Расія), МСК "Сумчанка" (Сумы, Украіна), ХК "Тэкстыльшчык-БарДУ" (Баранавічы), ХК "Вікторыя" (Смалявічы).
2-4 красавіка запланаваны матчы групавой стадыі спаборніцтваў, 5 красавіка пройдуць паўфіналы паміж дружынамі, якія занялі ў групах першыя і другія месцы, а таксама кваліфікацыйныя паядынкі паміж камандамі, стаўшымі ў сваіх квартэтах трэцімі і чацвёртымі.
На наступны дзень, 6 красавіка, пераможцы паўфіналаў разыграюць ганаровы трафей (пачатак матчу ў 16.00). Каманды, якія ўступілі на гэтай стадыі турніру, будуць аспрэчваць трэцяе месца (14.00). Пераможцы кваліфікацыйных матчаў паспаборнічаюць за пятую-шостую пазіцыі ў падагульняючым пратаколе (12.00). Іх сапернікі разыграюць 7-8-я месцы (10.00).-0-
