17 верасня, Мінск /Кар. БЕЛТА/. Сёння ў Лісабоне стартуе розыгрыш Кубка Еўропы па баскетболе 3х3 сярод юнацкіх каманд (U-17), у якім прымуць удзел дзве беларускія зборныя, паведамляе карэспандэнт БЕЛТА.
У мужчынскім турніры беларусы сёння ў першым матчы папярэдняй групы С сустрэнуцца з равеснікамі са Славеніі, а заўтра згуляюць з камандай Ізраіля. У складзе зборнай Беларусі пад кіраўніцтвам Аляксандра Лашкевіча выступяць Ілья Мілашэўскі, Данііл Каско, Іван Балдуеў, Аляксей Шаўчэнка, Міхаіл Галубко.
Беларускія дзяўчаты свае сустрэчы ў групе D правядуць заўтра - спачатку іх саперніцамі будуць баскетбалісткі Нідэрландаў, а потым - ізраільцянкі. Беларусь прадставяць Кацярына Новік, Паліна Касцюкавец, Паліна Верабей, Яўгенія Бернацкая, галоўны трэнер - Андрэй Навойчык.
Пасля завяршэння першага этапу спаборніцтваў барацьбу за ўзнагароды прадоўжаць па дзве лепшыя каманды з папярэдніх груп. Вырашальныя паядынкі ў партугальскай сталіцы адбудуцца 19 верасня.-0-