7 лютага, Пекін /Кар. БЕЛТА/. Беларуская біятланістка Ірына Лешчанка незадаволена сваім выступленнем у індывідуальнай гонцы Алімпіяды-2022, у якой яна заняла 41-е месца, паведамляе карэспандэнт БЕЛТА.
"Вядома, сёння хацелася паказаць больш высокі рэзультат. Спадзявалася страляць больш дакладна, але не атрымалася, на ўсіх чатырох агнявых рубяжах дапусціла па адным промаху. У выніку менавіта гэта і паўплывала, рэзультат атрымаўся далёка не самым добрым", - адзначыла алімпійская чэмпіёнка Пхёнчхана-2018 у эстафеце. Лепшай з квартэта беларускіх страляючых лыжніц сёння была лідар каманды Дзінара Алімбекава, якая рэальна прэтэндавала на перамогу, але промах на апошнім агнявым рубяжы адкінуў яе на 5-е месца.
Заўтра ў біятлонным цэнтры ў Чжанцзякоу пройдзе мужчынская індывідуальная гонка на 20 км з чатырма заходамі на стрэльбішча. На пекінскіх Гульнях біятланісты разыгрываюць 11 камплектаў алімпійскіх узнагарод.-0-
