12 красавіка, Мінск /Кар. БЕЛТА/. Абаронца Нік Бэйлен і нападаючы Джэф Плат далучацца да зборнай Беларусі для падрыхтоўкі да чэмпіянату свету ў дывізіёне 1 у групе А ў Нур-Султане, паведамілі карэспандэнту БЕЛТА ў прэс-службе федэрацыі хакея.
Плануецца, што Нік Бэйлен, які выступае ў КХЛ за чэлябінскі "Трактар", далучыцца да каманды Андрэя Сідарэнкі 13 красавіка, а Джэф Плат - 20 красавіка. Пасля дня адпачынку нацыянальная зборная сёння зноў пачала трэніроўкі. Дружыну папоўняць ігракі з клубаў фіналістаў плэй-оф экстралігі.
У трэніровачным лагеры ў наступныя тры дні чакаюць галкіпера Аляксандра Асіпкова, абаронцу Дзмітрыя Знахарэнку, форвардаў Міхаіла Стэфановіча, Паўла Развадоўскага, Станіслава Лапачука, Сяргея Дразда і Аляксандра Когалева (усе - "Юнацтва"). З гродзенскага "Нёмана" ў зборную запрошаны варатар Віталь Трус, абаронца Мікіта Крыскін і нападаючыя Аляксандр і Сяргей Маляўкі, Павел Баярчук, Мікіта Рэмезаў, Арцём Кіслы.
Нацыянальная каманда будзе рыхтавацца ў Мінску да 23 красавіка, пасля чаго возьме курс на Казахстан, дзе з 29 красавіка стартуе чэмпіянат свету ў дывізіёне 1.
У Нур-Султане зборная Беларусі правядзе 25 красавіка таварыскі матч супраць гаспадароў будучага чэмпіянату свету ў дывізіёна 1. Сусветны форум у групе А пройдзе ў Нур-Султане з 29 красавіка па 5 мая.
За дзве пуцёўкі ў топ-дывізіён таксама паспрачаюцца зборныя Славеніі, Венгрыі, Рэспублікі Карэя і Літвы.-0-
