27 снежня, Мінск /Кар. БЕЛТА/. Расійскі абаронца Рынат Валіеў перайшоў у склад хакеістаў мінскага "Дынама" з казанскага "Ак Барса". Узамен казанская каманда атрымала правы на фінскага абаронцу Юліуса Хонку. Такая інфармацыя размешчана на афіцыйным сайце дынамаўцаў, паведамляе карэспандэнт БЕЛТА.
У гэтым сезоне 26-гадовы навабранец "зуброў" правёў за "Ак Барс" адну сустрэчу ў рэгулярным чэмпіянаце КХЛ. Акрамя таго, Рынат Валіеў згуляў 23 матчы ў складзе казанскага "Барса" ў расійскай ВХЛ, набраўшы 9 бамбардзірскіх ачкоў (1 шайба і 8 рэзультатыўных перадач). У мінулыя гады ён таксама правёў 12 матчаў у НХЛ, выступаючы за "Таронта" і "Манрэаль".
Хакеісты мінскага "Дынама" цяпер займаюць 8-е месца ў турнірнай табліцы Заходняй канферэнцыі КХЛ, набраўшы 48 ачкоў у 43 праведзеных сустрэчах. Свой наступны паядынак падапечныя Крэйга Вудкрафта правядуць 29 снежня на лёдзе "Мінск-Арэны" супраць магнітагорскага "Металурга".-0-
