Гарнасько перамагла ў мнагабор'і на Універсіядзе ў Германіі

18 ліпеня, Мінск /Кар. БЕЛТА/. Беларуска Аліна Гарнасько стала чэмпіёнкай у мнагабор'і на спаборніцтвах па мастацкай гімнастыцы на Універсіядзе 2025 года ў Германіі, паведамляе карэспандэнт БЕЛТА.

За медалі ў самым прэстыжным відзе праграмы спаборнічалі 49 дзяўчат, нашу каманду прадставілі лідары айчыннай гімнастыкі Аліна Гарнасько і Настасся Салас. Гарнасько атрымала пераканаўчую перамогу з сумай 114,850 бала, паказаўшы лепшыя рэзультаты ў практыкаваннях з мячом і стужкай і стала другой у кампазіцыях з абручом і булавамі.

Серабро заваявала Тахміна Ікромава з Узбекістана (112,700), тройку прызёраў замкнула венгерка Фані Пігніцкі (108,850). Настасся Салас заняла шостае месца, набраўшы 105,750 бала. У суботу, 19 ліпеня, дзяўчаты разыграюць медалі ў асобных відах: Гарнасько прыме ўдзел ва ўсіх чатырох фіналах, Салас выступіць у практыкаваннях з булавамі і стужкай.

XXXII Сусветная летняя Універсіяда праходзіць у Рэйнска-Рурскім рэгіёне Германіі, турнір грацый прымае горад Эсэн. Усяго студэнцкія спаборніцтвы сабралі больш за 8 тыс. спартсменаў са 115 краін, якія вызначаюць лепшых у 18 відах спорту.-0-