Стралкі з пісталета Яскевіч і Казак заваявалі бронзу чэмпіянату Еўропы ў міксце

2 сакавіка, Мінск /Кар. БЕЛТА/. Беларускія спартсмены Любоў Яскевіч і Іван Казак занялі трэцяе месца на чэмпіянаце Еўропы па кулявой стральбе ў сталіцы Арменіі Ерэване, паведамляе карэспандэнт БЕЛТА.

Удзел у кваліфікацыі ў стральбе з пнеўматычнага пісталета на 10 метраў сярод змешаных пар прынялі 36 дуэтаў, у фінальны турнір прайшлі чатыры лепшыя каманды. Любоў Яскевіч і Іван Казак набралі 575 ачкоў з 600 і замкнулі топ-4, яшчэ адзін беларускі тандэм у складзе Аляксандры Пятровай і Уладзіслава Дземеша заняў шостае месца з сумай 574 ачкі.

У фінале Яскевіч і Казак паказалі рэзультат 412,8 бала і заваявалі бронзавыя ўзнагароды, апярэдзіўшы прадстаўнікоў Аўстрыі. Чэмпіёнамі Еўропы сталі венгры Вераніка Маёр і Акаш Надзь, серабро ўзялі Шэвал Тархан і Юсуф Дзікеч з Турцыі. У мінулым годзе Любоў заваявала асабістае золата кантынентальнага форуму, Іван з'яўляецца трохразовым пераможцам II Гульняў краін СНД.

У жаночым індывідуальным турніры ў стральбе з пнеўматычнага пісталета на 10 метраў Пятрова заняла сёмае месца, Яскевіч стала 23-й. У гэтым жа відзе праграмы ў мужчын Казак размясціўся на 21-м радку, а Дземеш быў 31-м сярод 77 удзельнікаў.-0-