24 чэрвеня, Мінск /Кар. БЕЛТА/. Футбалісткі "Мінска" і сталічнага "Дынама-БДУФК", як і год таму, сталі фіналісткамі 30-га розыгрышу Кубка Беларусі сярод жаночых каманд, паведамляе карэспандэнт БЕЛТА.
Цяперашнія чэмпіёнкі і ўладальніцы Кубка краіны спартсменкі "Дынама-БДУФК" у паўфінале на сваім полі не сустрэлі сур'ёзнага супраціўлення з боку ігракоў юніёрскай зборнай Беларусі (U-19), перамогшы з "сухім" лікам 7:0.
Другі паўфінал, які праходзіў у Гродне, быў больш напружаным. У першым тайме футбалісткі "Нёмана" выйшлі наперад пасля ўдару Паліны Далматавай, у хуткім часе пасля перапынку Мелана Сураўцава аднавіла раўнавагу ў ліку - 1:1. У дадатковы час вынік не змяніўся, а ў серыі пасляматчавых пенальці больш паспяховымі былі госці - 4:2. Мінчанкі заканчалі гульню ўдзевяцёх: у сярэдзіне першага тайма была выдалена Наталля Асмыковіч, а ў авертайме поле пакінула Настасся Пабягайла.
Такім чынам, у пачатку жніўня ў Мінску адбудзецца паўтор мінулага фіналу. Год таму ў апошні дзень лета ў вырашальным паядынку на полі сталічнага стадыёна "Дынама" ў асноўны і дадатковы час пераможца не быў вызначаны - 0:0, а ў серыі пенальці поспеху дамагліся футбалісткі "Дынама-БДУФК" - 5:4. Для каманды Юрыя Малеева гэты трафей стаў першым у гісторыі. Больш за ўсіх кубкам Беларусі валодалі футбалісткі "Бабруйчанкі", у якіх 10 выйграных фіналаў, у "Мінска" восем трафеяў, у магілёўскай "Надзеі" - чатыры, па тры разы выйгравалі віцебскі "Універсітэт" і сталічная "Зорка-БДУ".-0-
