2 ліпеня, Мінск /Кар. БЕЛТА/. Этап Кубка свету па мастацкай гімнастыцы BSB Bank стартуе сёння ў сталічным спарткомплексе "Мінск-Арэна", паведамляе карэспандэнт БЕЛТА.
Спаборніцтвы ў Мінску стануць для многіх спартсменак апошняй спробай сіл напярэдадні Алімпіяды ў Токіа. За ўзнагароды турніру паспаборнічаюць гімнасткі з 13 краін. У іх ліку спартсменкі з Расіі, Ізраіля, Балгарыі, Украіны і Японіі, якія стабільна знаходзяцца ў групе лідараў на самых прэстыжных спаборніцтвах.
У асабістых стартах Беларусь прадставяць Аліна Гарнасько і Настасся Салас. У групавых практыкаваннях у склад зборнай краіны ўвайшлі Ганна Гайдукевіч, Настасся Малаканава, Настасся Рыбакова, Ганна Швайба, Арына Цыцыліна і Карына Ярмоленка.
На мінулым дамашнім этапе Кубка свету зборная Беларусі заваявала дзве ўзнагароды. Напэўна і на гэты раз айчынныя грацыі парадуюць аматараў прыгожага віду спорту. На жаль, з-за эпідэміялагічнай абстаноўкі білеты на трыбуны не распаўсюджваліся, аднак сачыць за спаборніцтвамі можна ў прамым эфіры тэлеканала "Беларусь 5", а таксама на Youtube-канале Беларускай асацыяцыі гімнастыкі.
Арганізатарамі турніру выступілі Міністэрства спорту і турызму Рэспублікі Беларусь, Нацыянальны алімпійскі камітэт Рэспублікі Беларусь, Беларуская асацыяцыя гімнастыкі, Мінскі гарадскі выканаўчы камітэт, ДУ "Белспортзабеспячэнне".
РАСКЛАД СПАБОРНІЦТВАЎ:
2 ліпеня
15.00-15.15 - цырымонія адкрыцця;
15.20-16.45 - кваліфікацыйныя спаборніцтвы, група А - індывідуальныя практыкаванні (абруч, мяч);
17.00-18.30 - кваліфікацыйныя спаборніцтвы, група В - індывідуальныя практыкаванні (абруч, мяч);
19.00-19.45 - кваліфікацыйныя спаборніцтвы, групавыя практыкаванні (5 мячоў).
3 ліпеня
15.00-16.25 - кваліфікацыйныя спаборніцтвы, група В - індывідуальныя практыкаванні (булавы, стужка);
16.40-18.10 - кваліфікацыйныя спаборніцтвы, група А - індывідуальныя практыкаванні (булавы, стужка);
18.40-19.25 - кваліфікацыйныя спаборніцтвы, групавыя практыкаванні (3 абручы + булавы);
19.40-20.00 - цырымонія ўзнагароджвання, індывідуальныя практыкаванні, групавыя практыкаванні (мнагабор'е).
4 ліпеня
12.00-12.32 - фінальныя спаборніцтвы, індывідуальныя практыкаванні (абруч);
12.35-13.07 - фінальныя спаборніцтвы, індывідуальныя практыкаванні (мяч);
13.10-13.55 - фінальныя спаборніцтвы, групавыя практыкаванні (5 мячоў);
14.00-14.15 - цырымонія ўзнагароджвання;
14.15-14.47 - фінальныя спаборніцтвы, індывідуальныя практыкаванні (булавы);
14.50-15.22 - фінальныя спаборніцтвы, індывідуальныя практыкаванні (стужка);
15.25-16.05 - фінальныя спаборніцтвы, групавыя практыкаванні (3 абручы + булавы).-0-