10 студзеня, Мінск /Кар. БЕЛТА/. Экіпаж "МАЗ-СПОРТаўта" пад кіраўніцтвам Сяргея Вязовіча заняў трэцяе месца на шостым этапе ралі "Дакар", паведамляе карэспандэнт БЕЛТА.
Беларускі "МАЗ" уступіў лідару заезду 12 мін 32 сек. Першым фінішаваў грузавік расійскага "КАМАЗ-майстра" пад кіраваннем Андрэя Каргінава, які праехаў 477 км за 4 гадз 56 мін 18 сек. Другое месца заняў экіпаж яго таварыша па камандзе Антона Шыбалава (адставанне 4 мін 21 сек).
У агульным заліку грузавікоў беларус Сяргей Вязовіч па-ранейшаму размяшчаецца на трэцяй пазіцыі (адставанне 36 мін 30 сек). Лідзіруе экіпаж расійскага "КАМАЗ-майстра" Андрэя Каргінава (25 гадз 6 мін 20 сек). На другім месцы знаходзіцца яго партнёр па камандзе Антон Шыбалаў (адставанне 19 мін 14 сек).
"Дакар" упершыню праходзіць на Блізкім Усходзе, куды старты перайшлі пасля 11 гадоў у Паўднёвай Амерыцы. З 2020 года як мінімум пяць гадоў запар ралі-марафон будзе прымаць Саудаўская Аравія. Уся дыстанцыя складзе 7900 км. На старт выйшаў 351 экіпаж (134 пазадарожнікі і UTV, 170 матацыклаў і квадрацыклаў, 47 грузавікоў). Фінішуе ралі-рэйд 17 студзеня ў Кідыі.-0-
