16 красавіка, Мінск /Кар. БЕЛТА/. МАК і аргкамітэт Токіа-2020 будуць працаваць над дарожнай картай па правядзенні летніх Гульняў у японскай сталіцы ў 2021 годзе. Дарожную карту прадставяць у маі гэтага года, паведамілі карэспандэнту БЕЛТА ў прэс-службе НАК Беларусі.
Рашэнне аб гэтым прынята ў час тэлеканферэнцыі, у якой прынялі ўдзел кіраўнік каардынацыйнай камісіі МАК Джон Коўтс, выканаўчы дырэктар Алімпійскіх гульняў МАК Крыстаф Дубі, старшыня арганізацыйнага камітэта "Токіа-2020" Ёсіра Моры і выканаўчы дырэктар аргкамітэта Алімпійскіх гульняў у Токіа Ташыра Мута. Над дарожнай картай будуць працаваць дзве рабочыя групы ад МАК і японскага боку.
Ключавыя элементы дарожнай карты на 2021 год возьмуць з плана правядзення Гульняў у 2020 годзе. Асаблівую ўвагу ўдзеляць пляцоўкам і графіку правядзення спаборніцтваў, якія першапачаткова ўзгаднілі ўсе зацікаўленыя бакі. На аснове Алімпійскага парадку дня 2020 года МАК, Міжнародны паралімпійскі камітэт (МПК) і ўсе зацікаўленыя бакі вывучаць усе магчымасці для аптымізацыі і скарачэння расходаў, выкліканых пераносам тэрмінаў.
"З моманту рашэння аб пераносе Гульняў ужо ўнесена некаторая яснасць і вызначанасць у планы спартсменаў, балельшчыкаў і зацікаўленых бакоў. Выкладзеныя на тэлеканферэнцыі прынцыпы дадуць нам магчымасць прадаўжаць дзейнічаць у зададзеным напрамку і як мага больш эфектыўна адказваць на многія пытанні, якія застаюцца", - адзначыў Джон Коўтс.
"Аргкамітэт лічыць, што рашэнне аб стварэнні дарожнай карты - важнае дасягненне нашай работы", - заявіў Ёсіра Моры. Ён таксама нагадаў, што ў Токіа 26 сакавіка была створана рабочая група "Новы запуск". Яна дапамагае пераадолець праблемы, якія з'явіліся пасля пераносу Гулььняў на 2021 год у сувязі з пандэміяй.-0-
