3 жніўня, Мінск /Кар. БЕЛТА/. Лепшай беларускай біятланістцы, чатырохразовай алімпійскай чэмпіёнцы Дар'і Домрачавай спаўняецца 35 гадоў.
Дар'я Домрачава нарадзілася 3 жніўня 1986 года ў Мінску. У 1990 годзе яна з бацькамі-архітэктарамі выехала ў сібірскі горад Нягань. Спачатку Даша захаплялася баскетболам, а ў 1992 годзе разам са старэйшым братам пачала займацца лыжамі. У біятлон Дар'я прыйшла ва ўзросце 13 гадоў, яе першым настаўнікам стаў Альберт Мусін. Дар'я ўсе летнія канікулы праводзіла ў Беларусі ў сваіх сваякоў, у 2003 годзе сям'я вярнулася ў Мінск.
Пачатак спартыўнай кар'еры Дар'і мог зламаць любога. У 2004 годзе, калі яна яшчэ выступала за Расію, кіраўніцтва расійскага Саюза біятланістаў выключыла яе са зборнай з вельмі крыўдным вердыктам - бесперспектыўная. І гэта прытым, што яна была неаднаразовай чэмпіёнкай краіны сярод юніёрак. Аднак Даша не здавалася і ў хуткім часе стала выступаць за родную краіну. І менавіта ў Беларусі дабілася выдатных спартыўных рэзультатаў. Першыя поспехі прыйшлі на юніёрскім чэмпіянаце планеты 2005 года ў фінскім Контыялахты. Там будучая прыма біятлона стала чэмпіёнкай у спрынце і ў гонцы праследавання. Дэбют Домрачавай на дарослым Кубку свету адбыўся 1 снежня 2006 года ў шведскім Эстэрсундзе - у спрынтарскай гонцы яна заняла даволі высокае для навічка 16-е месца.
Упершыню на п'едэстал гонару этапаў Кубка свету Дар'я паднялася 16 студзеня 2009 года, заняўшы 3-е месца ў спрынтарскай гонцы ў нямецкім Рупольдынгу. У тым жа годзе на чэмпіянаце свету ў Пхёнчхане яна паставіла рэкорд па колькасці адыграных месцаў у гонцы праследавання сярод жанчын - пасля 53-га месца ў спрынце паднялася на 48 пазіцый і ледзь не дасягнула подыума. У сезоне 2009/2010 Дар'я Домрачава ўпершыню стала пераможцай гонак на кубкавых этапах - у Контыялахты 13 сакавіка была лепшай у спрынце, а на наступны дзень выйграла гонку праследавання. Усяго за доўгія гады спартыўнай кар'еры Дар'я Домрачава 81 раз паднімалася на п'едэстал гонару ў асабістых гонках: у яе 34 першыя месцы, 23 другія і 24 трэція. У 2015 годзе Дар'я стала лепшай па выніках Кубка свету, заваяваўшы галоўны прыз - Вялікі хрустальны глобус. На чэмпіянатах планеты заваявала два залатыя, чатыры сярэбраныя і адзін бронзавы медалі. Акрамя таго, у яе два золаты чэмпіянату Еўропы і адно на Універсіядзе.
Асабна ва ўзнагародным спісе стаяць галоўныя старты - Алімпійскія гульні. Медальны адлік Дар'я Домрачава пачала ў Ванкуверы ў 2010 годзе, заваяваўшы бронзу ў самай складанай дысцыпліне - індывідуальнай гонцы на 15 км. Пік Алімпійскіх дасягненняў беларускай прымы біятлона прыпаў на Сочы, дзе ў 2014 годзе яна выйграла тры ўзнагароды вышэйшай пробы (праследаванне, індывідуальная гонка, мас-старт). За выдатныя дасягненні на сочынскай Алімпіядзе Дар'я Домрачава была ўдастоена звання "Герой Беларусі". На Гульнях у Пхёнчхане ў 2018 годзе разам з сяброўкамі па эстафетнай камандзе заваявала сваё чацвёртае алімпійскае золата. Гэта перамога зрабіла яе самай тытулаванай біятланісткай у свеце.
25 чэрвеня 2018 года Дар'я Домрачава афіцыйна аб'явіла аб завяршэнні актыўнай спартыўнай кар'еры. 18 лютага 2019 года яе праводзілі з вялікага спорту. Цырымонія прайшла ў спартыўным комплексе "Раўбічы" пасля фестывалю "Гонка легенд", ідэйным натхняльнікам якога з'яўляецца сама біятланістка. У фестывалі прынялі ўдзел вядомыя біятланісты, якія дабіліся значных перамог у спартыўнай кар'еры. Адным з самых тытулаваных удзельнікаў быў муж Дар'і васьміразовы алімпійскі чэмпіён па біятлоне нарвежац Уле-Эйнар Б'ёрндален. Праводзіны завяршыліся маляўнічым лазерным шоу, салютам і доўгімі авацыямі балельшчыкаў.
У 2019 годзе Дар'я стала лаўрэатам міждзяржаўнай прэміі "Зоркі Садружнасці".
У верасні 2019 года Дар'я Домрачава падпісала кантракт з Нацыянальным алімпійскім камітэтам Кітая і пачала падрыхтоўку зборнай гэтай краіны да зімовых Алімпійскіх гульняў 2022 года ў Пекіне.
У 2020 годзе чатырохразовая чэмпіёнка ўвайшла ў склад журы конкурсу па распрацоўцы талісмана да чэмпіянату свету па хакеі 2021 года.
Акрамя спорту Дар'я заўсёды вельмі сур'ёзна ставілася і да іншых сфер жыцця. У яе дзве вышэйшыя адукацыі, атрыманыя ў Беларускім дзяржаўным эканамічным універсітэце: яна абараніла дыплом па тэме "Рэклама ў індустрыі турызму", а праз некаторы час скончыла навучанне па гаспадарчым праве.
На асабістым фронце ў Домрачавай таксама ўсё ў парадку - яна замужам за вялікім біятланістам усіх часоў нарвежцам Уле-Эйнарам Б'ёрндаленам. У зорнай пары 1 кастрычніка 2016 года ў Мінску нарадзілася дачка Ксенія. Цяпер менавіта сям'я стала галоўным прыярытэтам для Дар'і Домрачавай.
30 ліпеня 2021 года на экраны выйшаў другі фільм праекта "Правілы жыцця беларускіх спартсменаў". Гераіняй сюжэта стала чатырохразовая алімпійская чэмпіёнка біятланістка Дар'я Домрачава, якая ў фільме падзялілася сваімі сакрэтамі, як дабіцца поспеху, заставацца пазітыўным і зараджаным на барацьбу чалавекам у любых сітуацыях.-0-
