19 студзеня, Мінск /Кар. БЕЛТА/. Гандбалісты зборнай Беларусі перамогай завяршылі выступленне на чэмпіянаце Еўропы, які праходзіць на пляцоўках Венгрыі і Славакіі, паведамляе карэспандэнт БЕЛТА.
У сваім апошнім паядынку папярэдняй групы D падапечныя Юрыя Шаўцова абыгралі ў Браціславе аўстрыйцаў з лікам 29:26. Да гэтага беларусы ўступілі камандам Германіі (29:33) і Польшчы (20:29). Беларусы і аўстрыйцы не змаглі прабіцца ў наступны этап спаборніцтваў. У матчы двух лідараў гэтага квартэта гандбалісты зборнай Германіі абыгралі каманду Польшчы з рэзультатам 30:23. Падагульняючае становішча: Германія - 6 ачкоў, Польшча - 4, Беларусь - 2, Аўстрыя - 0. Два гады таму зборная Беларусі выйшла ў асноўны этап ЧЕ, але трапіць у паўфінал не змагла, заняўшы дзясятае падагульняючае месца. Усяго беларускія гандбалісты сем разоў гулялі ў фінальных турнірах кантынентальнага першынства, іх лепшым рэзультатам стала 8-е месца ў 1994 годзе на турніры ў Партугаліі з удзелам 12 каманд.
Гандбалісты Нідэрландаў у заключнай сустрэчы групы В перамаглі ў Будапешце партугальцаў з мінімальнай перавагай - 32:31. У другім матчы 3-га тура венгры ўступілі ісландцам - 30:31. Падагульняючае становішча: Ісландыя - 6, Нідэрланды - 4, Венгрыя - 2, Партугалія - 0.
Склады дзвюх шасцёрак асноўнага этапу 15-га мужчынскага першынства Старога Свету выглядаюць так:
група 1 (Будапешт): Данія (2 ачкі), Францыя (2), Ісландыя (2), Нідэрланды (0), Чарнагорыя (0), Харватыя (0);
група 2 (Браціслава): Германія (2), Іспанія (2), Расія (2), Польшча (0), Швецыя (0), Нарвегія (0).
Сустрэчы другога раўнда пройдуць з 20 па 26 студзеня. Паўфіналы намечаны на 28 студзеня, вырашальны паядынак за чэмпіёнскі тытул і матч за бронзавыя ўзнагароды адбудуцца 30 студзеня ў венгерскай сталіцы.
На мінулым чэмпіянаце Еўропы, які праходзіў у 2020 годзе на пляцоўках Аўстрыі, Нарвегіі і Швецыі, сваё другое запар золата заваявалі гандбалісты Іспаніі, якія перамаглі ў фінале харватаў з лікам 22:20. Уладальнікамі бронзы сталі нарвежцы, якія разграмілі ў матчы за 3-е месца славенцаў - 28:20. Зборная Швецыі чатыры разы станавілася чэмпіёнам Еўропы, у французаў на адзін тытул менш, па два разы лепшымі ў Старым Свеце былі каманды Даніі, Германіі і Іспаніі, аднойчы золата заваявалі расіяне.-0-
