24 чэрвеня, Мінск /Кар. БЕЛТА/. Баскетбалісткі зборнай Беларусі прабіліся ў паўфінал жаночага чэмпіянату Еўропы, паведамляе карэспандэнт БЕЛТА.
У іспанскай Валенсіі падапечныя Наталлі Трафімавай перамаглі ў чвэрцьфінальным паядынку каманду Швецыі з лікам 58:46 (15:10, 11:4, 19:17, 13:15). Самай рэзультатыўнай у складзе беларусак стала Марыя Папова, якая набрала 18 ачкоў.
У матчы за выхад у фінал беларускія баскетбалісткі сустрэнуцца з камандай Францыі, якая ў французскім Страсбургу ўзяла верх над зборнай Босніі і Герцагавіны - 80:67. На папярэднім этапе цяперашняга кантынентальнага першынства баскетбалісткі зборнай Беларусі занялі першае месца ў групе А, абыграўшы саперніц з Іспаніі - 53:51 і Швецыі - 78:54, але ўступіўшы Славакіі - 54:58.
Паўфінальныя сустрэчы 38-га жаночага кантынентальнага першынства пройдуць 26 чэрвеня, вырашальны паядынак за чэмпіёнскі тытул і матч за бронзу адбудуцца 27 чэрвеня.
На мінулым чэмпіянаце Еўропы два гады таму золата заваявалі баскетбалісткі Іспаніі, якія разграмілі ў фінале францужанак - 86:66, бронзавым прызёрам стала зборная Сербіі, якая перамагла ў гульні за 3-е месца каманду Вялікабрытаніі - 81:55. Зборная Беларусі выступіла няўдала, не здолеўшы пераадолець групавы этап. Вышэйшым дасягненнем беларускіх баскетбалістак стала бронза, якую яны заваявалі ў 2007 годзе на дэбютным для сябе першынстве Старога Свету, праводзімым у Італіі.-0-
