6 мая, Мінск /Кар. БЕЛТА/. Беларускія баксёры нацэлены на высокі рэзультат на Алімпійскіх гульнях у Токіа. Аб гэтым карэспандэнту БЕЛТА паведаміў выканаўчы дырэктар Беларускай федэрацыі бокса Дзяніс Сабалеўскі.
"Каляндар на 2021 год будзе напружаным. Як правіла, у год правядзення Алімпіяды сусветныя форумы не праводзяцца, але тут атрымаецца выключэнне. Да верасня ніякіх спаборніцтваў па боксе ў свеце не будзе арганізавана, турніры плануюцца толькі з верасня, - сказаў Дзяніс Сабалеўскі. - Асноўная мэта ў беларускіх баксёраў ранейшая - гэта Алімпійскія гульні, дзе спартсмены нацэлены на высокі рэзультат. Сусветны форум таксама з'яўляецца важным стартам, атлеты, якія прадставяць Беларусь на ім, вызначацца бліжэй да дат правядзення. Цяпер беларускія баксёры знаходзяцца ў "Стайках". Там створаны ўсе ўмовы для трэніровак. Спартсмены не расслабляюцца, падтрымліваюць форму".
Ён адзначыў, што восенню пройдуць чэмпіянат Беларусі і шэраг турніраў, якія дапамогуць спартсменам вярнуцца ў спаборніцкі рытм.
Як паведамлялася, чэмпіянат свету па боксе ў 2021 годзе быў перанесены ў Бялград. Першапачаткова планетарны форум павінен быў адбыцца ў Нью-Дэлі (Індыя), аднак перанесены па прычыне невыканання арганізатарамі сваіх абавязацельстваў. Індыйскі бок не аплаціў неабходны ў такіх выпадках узнос, і Міжнародная асацыяцыя бокса (AIBA) скасавала кантракт. Цяпер Федэрацыі бокса Індыі трэба будзе заплаціць штраф за адмену спаборніцтваў.
У сувязі з пераносам тэрмінаў Алімпійскіх гульняў 2020 года і пандэміяй каранавіруса тэрміны правядзення чэмпіянату свету - 2021 будуць агавораны з арганізатарамі дадаткова. Апошні раз Сербія прымала старты лепшых баксёраў планеты 43 гады таму.
Міжнародны алімпійскі камітэт 30 лістапада 2018 года паставіў пад сумненне правядзенне баксёрскага турніру на Алімпійскіх гульнях 2020 года. Рашэнне было прынята пасля расследавання ў дачыненні да AIBA. У маі 2019 года МАК прыняў рашэнне захаваць старты баксёраў на Гульнях у Токіа. Пры гэтым AIBA была пазбаўленая статусу прызнання, паколькі не змагла выканаць патрабаванні МАК, якія датычыліся фінансаў, кіравання, судзейства і этыкі, а місія арганізацыі кваліфікацыйных стартаў і турніру ў Токіа была ўскладзена на спецыяльна створаную МАК рабочую групу на чале з прэзідэнтам Міжнароднай федэрацыі гімнастыкі і членам МАК з Японіі Марынары Ватанабэ.-0-
