19 кастрычніка, Мінск /Кар. БЕЛТА/. Беларуская велагоншчыца Алена Амялюсік, абараняючы колеры каманды Canyon-Sram Racing, заняла шостае месца на Туры Фландрыі-2020, паведамляе карэспандэнт БЕЛТА.
Перамогу святкавала нідэрландская веласіпедыстка Шанталь Ван Дэн Брок-Блаак з каманды Boels Dolmans. Дыстанцыю 135,6 км яна пераадолела за 3 гадзіны 29 мінут 57 секунд.
Другое месца за сабой пакінула яе суайчынніца і аднаклубніца Эмі Пітэрс, якая ўступіла пераможцы 1 мінуту 1 секунду. Замкнула тройку мацнейшых бельгійка Лотэ Капецкі з Lotto Soudal Ladies.
Алена Амялюсік фінішавала ў асноўнай групе спартсменак разам з Эмі Пітэрс і Лотэ Капецкі, паказаўшы з імі аднолькавы час.
Тур Фландрыі адна з самых прэстыжных аднадзённых гонак у шашэйным веласпорце. У бягучым годзе старты сярод жанчын праводзіліся 17-ы раз.-0-