10 верасня, Мінск /Кар. БЕЛТА/. Беларуская тэнісістка Арына Сабаленка не змагла прабіцца ў фінал адкрытага чэмпіянату ЗША, паведамляе карэспандэнт БЕЛТА.
Мінулай ноччу ў паўфінале другая ракетка свету сустракалася з прадстаўніцай Канады Лэйлай Фернандэс, у якой 73-я пазіцыя ў рэйтынгу WTA, і за дзве з паловай гадзіны ўступіла ў трохсэтавым паядынку - 6:7 (3:7), 6:4, 4:6. У гэтай гульні Сабаленка 10 разоў падавала на вылет, супраць 6 эйсаў у саперніцы, але дапусціла 8 двайных памылак на падачы. У вырашальным матчы 19-гадовая канадская тэнісістка сустрэнецца з 18-гадовай брытанкай Эмай Радукану, якая прабілася ў асноўную сетку US Open праз кваліфікацыю.
На старце US Open-2021 Арына Сабаленка адолела сербку Ніну Стаянавіч (94) - 6:4, 6:7 (4:7), 6:0, потым разграміла славенскую тэнісістку Тамару Зіданшак (40) - 6:3, 6:1, у 1/16 фіналу выйграла ў амерыканкі Даніэль Колінз (29) - 6:3, 6:3, у 1/8 фіналу перамагла бельгійку Элізэ Мертэнс (16) - 6:4, 6:1, а ў чвэрцьфінале была мацнейшая за чэшку Барбару Крэйчыкаву (9) - 6:1, 6:4.
У гэтым сезоне Арына Сабаленка ўжо даходзіла да паўфінала "Вялікага шлема" - на Уімблдоне яна ўступіла дарогу ў фінал чэшскай тэнісістцы Караліне Плішкавай.
Агульны прызавы фонд US Open-2021 складае $57,5 млн. Пераможцы ў мужчынскім і жаночым адзіночных разрадах атрымаюць па $2,5 млн. Апошні ў гэтым сезоне турнір серыі "Вялікага шлема" фінішуе на нью-ёркскіх кортах 12 верасня. У мінулым годзе чэмпіёнскі тытул у мужчын упершыню заваяваў аўстрыец Дамінік Цім, у жанчын другі раз турнір выйграла японская тэнісістка Наомі Осака.-0-
