12 ліпеня, Брэст /Кар. БЕЛТА/. Амаль 400 спартсменаў прымуць удзел у летнім адкрытым Кубку Беларусі па лёгкай атлетыцы, які сёння стартуе ў Брэсце, паведаміў карэспандэнту БЕЛТА старшы трэнер нацыянальнай каманды па лёгкай атлетыцы па Брэсцкай вобласці Аляксей Ясковіч.
У гэтым годзе спаборніцтвы пройдуць у тры дні, а навізна турніру ў тым, што каралева спорту пакіне межы стадыёна. Адной з гарадскіх лакацый стане пляцоўка на скрыжаванні вуліцы Савецкай і набярэжнай Францыска Скарыны. Тут будуць устаноўлены два сектары - для штурхальнікаў ядра і скакуноў у вышыню. Абсталяванне для гэтых сектараў, у тым ліку стандартныя бегавыя дарожкі, спецыяльна вязуць з Мінска. Для гледачоў будуць устаноўлены трыбуны, і яны змогуць знаходзіцца вакол спаборніцкай зоны ў непасрэднай блізкасці ад спартсменаў.
"Правядзенне спаборніцтваў ва ўмовах гарадскога асяроддзя - даволі распаўсюджаная сусветная практыка. Гэта робіцца для папулярызацыі відаў спорту. З такой ініцыятывай выступіў старшыня Беларускай федэрацыі лёгкай атлетыкі Іван Ціхан. Яе падтрымалі мясцовыя ўлады. Калі не перашкодзіць надвор'е, мяркуецца, што гэта будзе шоу: запланаваны аўтограф-сесія знакамітых атлетаў, розныя актыўнасці для дзяцей, дэгустацыя марожанага", - расказаў Аляксей Ясковіч.
У спаборніцтвах прымуць удзел прадстаўнікі ўсіх абласцей і Мінска, а таксама спартсмены з Расіі. У тым ліку запланаваны выступленні алімпійскай чэмпіёнкі па скачках у вышыню расіянкі Марыі Ласіцкене і бронзавага прызёра Алімпійскіх гульняў у Токіа беларуса Максіма Недасекава.
Мерапрыемства на набярэжнай пачнецца ў 15.30 з дзіцячай лёгкаатлетычнай праграмы. У 16.30 у сектар для штурхання ядра выйдуць жанчыны. Затым мацнейшых у гэтай дысцыпліне будуць вызначаць сярод мужчын. У такой жа чарговасці ў 19.00 пачнуцца скачкі ў вышыню.
Астатняя частка турніру на працягу наступных двух дзён пройдзе на стадыёне "Брэсцкі". Там жа 13 ліпеня ў 15.30 адбудзецца афіцыйнае адкрыццё спаборніцтваў.-0-
