30 верасня, Мінск /Кар. БЕЛТА/. Пастановай Міністэрства адукацыі ад 23 жніўня 2022 г. нумар 282 зацверджаны правілы, якімі ўстаноўлены парадак правядзення атэстацыі навучэнцаў, курсантаў пры асваенні зместу адукацыйных праграм сярэдняй спецыяльнай адукацыі ва ўстановах адукацыі, іх філіялах, іншых адасобленых падраздзяленнях незалежна ад іх падпарадкаванасці і формы ўласнасці. Аб гэтым паведамляе БЕЛТА са спасылкай на Нацыянальны прававы інтэрнэт-партал.
Асновай для ацэнкі вынікаў вучэбнай дзейнасці навучэнцаў па вучэбных прадметах, модулях вучэбнага плана ўстановы адукацыі па спецыяльнасці з'яўляюцца адзнакі ў балах па дзесяцібальнай шкале, адзнакі "залічана", "не залічана", "не атэставаны(а)", а таксама запісы "вызвалены(а)" і "не вывучаў(ла)". Станоўчымі лічацца адзнакі ад 3 да 10 балаў, "залічана" і запісы "вызвалены(а)", "не вывучаў(ла)". Нездавальняючымі - адзнакі 1, 2 балы, "не залічана", "не атэставаны(а)".
Таксама правіламі прадугледжана бягучая, прамежкавая і падагульняючая атэстацыя навучэнцаў, а таксама ўрэгуляваны пытанні правядзення атэстацыі навучэнцаў пры праходжанні вучэбнай і вытворчай практыкі.
Правядзенне бягучай атэстацыі ажыццяўляецца на працягу семестра. Яна накіравана на перыядычны кантроль і ацэнку вынікаў вучэбнай дзейнасці навучэнцаў па вучэбным прадмеце, модулі прафесійнага кампанента вучэбнага плана ўстановы адукацыі па спецыяльнасці, што вывучаюцца ў семестры. Формы бягучай атэстацыі: апытанне, практычны занятак (практычная работа), лабараторны занятак (лабараторная работа), кантрольная работа, курсавы праект (курсавая работа), творчая работа (у тым ліку праслухоўванні, прагляды) і іншыя формы.
Мэта прамежкавай атэстацыі - ацэнка вынікаў вучэбнай дзейнасці навучэнцаў за семестр (вучэбны год) па вучэбным прадмеце, модулі прафесійнага кампанента вучэбнага плана ўстановы адукацыі па спецыяльнасці, што вывучаюцца ў семестры (навучальным годзе). Формы прамежкавай атэстацыі: абавязковая кантрольная работа, дыферэнцыраваны залік і экзамен.
Падагульняючая атэстацыя ажыццяўляецца экзаменацыйнымі камісіямі навучэнцаў па вучэбных прадметах, модулях агульнаадукацыйнага кампанента вучэбнага плана ўстановы адукацыі па спецыяльнасці, па якіх праводзяцца падагульняючыя іспыты пасля завяршэння навучання і выхавання на III ступені агульнай сярэдняй адукацыі. Падагульняючая атэстацыя па спецыяльнасці праводзіцца дзяржаўнымі кваліфікацыйнымі камісіямі. Правядзенне такой атэстацыі магчыма ў адной з наступных форм: дзяржаўны экзамен па спецыяльнасці і абарона дыпломнага праекта (дыпломнай работы).
Адзнака за семестр па практыцы (выключэнне - вучэбная практыка для атрымання кваліфікацыі рабочага (служачага) выстаўляецца пасля асваення навучэнцам зместу вучэбнай праграмы ўстановы адукацыі па практыцы ў поўным аб'ёме і здачы адпаведнай справаздачнасці. Яна вызначаецца як сярэдняе арыфметычнае ўсіх адзнак. Ацэньванню падлягаюць усе навучэнцы. Пасля завяршэння вучэбнай практыкі для атрымання кваліфікацыі рабочага (служачага) праводзіцца кваліфікацыйны экзамен, які ўключае выкананне кваліфікацыйнай пробнай работы і здачу экзамену па вучэбных прадметах, модулях прафесійнага кампанента вучэбнага плана ўстановы адукацыі па спецыяльнасці.
Пастанова ўступае ў сілу пасля яе афіцыйнага апублікавання.-0-
