9 студзеня, Мінск /Кар. БЕЛТА/. Аб'яўлены лаўрэаты конкурсу "100 талентаў Нацыянальнай акадэміі навук Беларусі" за 2019 год, імі сталі 10 маладых вучоных, паведамілі БЕЛТА ў прэс-службе НАН.
У банк даных "100 талентаў Нацыянальнай акадэміі навук Беларусі" (з выдачай адпаведнага сертыфіката) будуць уключаны намеснік загадчыка цэнтра "Фізіка плазмы" Інстытута фізікі імя Б.І.Сцяпанава кандыдат фізіка-матэматычных навук Максім Усачонак; вядучы навуковы супрацоўнік лабараторыі фізікі магнітных плёнак НПЦ па матэрыялазнаўстве кандыдат фізіка-матэматычных навук Аляксей Труханаў; старшы навуковы супрацоўнік аддзела крыягенных даследаванняў НПЦ па матэрыялазнаўстве кандыдат фізіка-матэматычных навук Дзмітрый Якімчук; старшы навуковы супрацоўнік лабараторыі бялковай інжынерыі Інстытута біяарганічнай хіміі, кандыдат хімічных навук Яраслаў Дзічэнка; дырэктар Інстытута прыродакарыстання НАН доктар фізіка-матэматычных навук Сяргей Лысенка; вучоны сакратар НПЦ па біярэсурсах кандыдат біялагічных навук Марына Шабета; старшы навуковы супрацоўнік шматпрофільнай дыягнастычнай лабараторыі Інстытута фізіялогіі кандыдат біялагічных навук Таццяна Хрусталёва; старшы навуковы супрацоўнік аддзела навейшай гісторыі Беларусі Інстытута гісторыі кандыдат гістарычных навук Аляксей Капліеў; загадчык сектара кааперацыі Інстытута сістэмных даследаванняў у АПК кандыдат эканамічных навук Ягор Гусакоў; старшы навуковы супрацоўнік аддзела тэхналогій мясных прадуктаў Інстытута мяса-малочнай прамысловасці НПЦ па харчаванні кандыдат тэхнічных навук Ірына Калтовіч.
Лаўрэатаў конкурсу таксама ўключаць у рэзерв кіруючых кадраў НАН Беларусі. Акрамя таго, яны атрымаюць аднаразовы грант на ўдзел у міжнародным навуковым мерапрыемстве на працягу аднаго каляндарнага года з моманту абвяшчэння вынікаў конкурсу. Таксама пры ўмове здавальняючай ацэнкі гадавой справаздачы аб навукова-даследчай, педагагічнай і інавацыйнай дзейнасці лаўрэатам конкурсу будзе выплачвацца штогадовая прэмія ў памеры да 50 базавых велічынь у перыяд уваходжання ў банк даных.
"У банку даных "100 талентаў Нацыянальнай акадэміі навук Беларусі" лаўрэаты конкурсу знаходзяцца да ўзросту 35 гадоў пры наяўнасці вучонай ступені кандыдата навук і да 45 гадоў для дактароў навук, - удакладнілі ў прэс-службе. - Калі работа лаўрэата конкурсу атрымлівае нездавальняючую ацэнку конкурснай камісіі, ён выключаецца з банка даных".
Агульная колькасць маладых вучоных, якія адначасова ўваходзяць у банк даных "100 талентаў Нацыянальнай акадэміі навук Беларусі", не можа перавышаць 100 чалавек, а штогадовая колькасць лаўрэатаў конкурсу - не больш як 20 чалавек.
Конкурс "100 талентаў Нацыянальнай акадэміі навук Беларусі" ўпершыню праводзіўся ў 2018 годзе. Сярод яго галоўных мэт - прыцягненне і замацаванне таленавітай моладзі ў навуковай, навукова-тэхнічнай і інавацыйнай сферах, стварэнне маладзёжных навукова-даследчых груп і амаладжэнне кадравага складу навуковых арганізацый НАН Беларусі, а таксама забеспячэнне пераемнасці паміж вучонымі розных пакаленняў. У конкурсе могуць прымаць удзел маладыя вучоныя НАН Беларусі, якія абаранілі кандыдацкую дысертацыю ва ўзросце да 30 гадоў або атрымалі вучоную ступень доктара навук ва ўзросце да 40 гадоў.-0-
