25 чэрвеня, Мінск /Кар. БЕЛТА/. У выхадныя ў Беларусі захаваецца цёплае надвор'е, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Вялікі скандынаўскі антыцыклон, які размясціўся над тэрыторыяй Беларусі, абумовіў вельмі цёплае і сухое надвор'е. У пятніцу, 26 чэрвеня, змяненняў у сінаптычнай сітуацыі не адбудзецца. Чакаецца пераважна без ападкаў надвор'е. Тэмпература паветра ноччу складзе ад 13 да 19 градусаў цяпла, днём - 26-31 вышэй за нуль.
У суботу, 27 чэрвеня, ноччу большая частка рэспублікі застанецца ў вобласці павышанага атмасфернага ціску, у дзённыя гадзіны з тэрыторыі Польшчы на заходнюю частку краіны перамесціцца франтальная сістэма. Ноччу месцамі па Брэсцкай вобласці, раніцай і днём па заходняй палавіне краіны пройдуць кароткачасовыя дажджы. У асобных раёнах прагрымяць навальніцы. Ноччу будзе 12-18 градусаў цяпла, днём - плюс 24-30.
У нядзелю, 28 чэрвеня, надвор'е будуць вызначаць атмасферныя франты, якія перамяшчаюцца з Заходняй Еўропы. На большай частцы тэрыторыі краіны чакаюцца кароткачасовыя дажджы, месцамі навальніцы. Ноччу прагназуюць 14-19 вышэй за нуль, днём - 22-29 градусаў цяпла.
"У пачатку наступнага тыдня тэрыторыя Беларусі застанецца пад уплывам атмасферных франтоў, за якімі ў рэспубліку пачне паступаць халаднаватая паветраная маса паўночнаатлантычнага паходжання, і з аўторка ў краіне ўсталюецца халаднаватае надвор'е", - адзначылі сіноптыкі.-0-
