31 жніўня, Мінск /Кар. БЕЛТА/. У Вярхоўным і абласных судах завершана лічбавізацыя правасуддзя. Аб гэтым расказаў сёння журналістам старшыня Вярхоўнага суда Беларусі Валянцін Сукала, перадае карэспандэнт БЕЛТА.
"Да 1 верасня мы павінны былі завяршыць лічбавізацыю правасуддзя ў абласных і Вярхоўным судах. Гэта даволі працаёмкі і складаны працэс, але, тым не менш, нам удалося гэта выканаць. І цяпер у 14 абласных судах і Вярхоўным судзе мы будзем працаваць ва ўмовах сучаснага правасуддзя, поўнай лічбавізацыі", - расказаў Валянцін Сукала.
Паводле яго слоў, гэта будзе відаць не толькі па аўдыя- і відэафіксацыі судовых працэсаў, але і іншых магчымасцях. "Мы запускаем адзіную аўтаматызаваную інфармацыйную сістэму судоў агульнай юрысдыкцыі, якая дае магчымасць фіксаваць у рэжыме анлайн кожную сітуацыю ў кожным раённым судзе", - адзначыў старшыня Вярхоўнага суда.
Валянцін Сукала таксама расказаў пра сваю сустрэчу з кіраўніком дзяржавы Аляксандрам Лукашэнкам. Адным з разгледжаных пытанняў стаў цяперашні стан судовай сістэмы. Старшыня Вярхоўнага суда заявіў, што, нягледзячы на некаторую напружанасць з-за ўзросшай колькасці разглядаемых адміністрацыйных спраў у мінскіх судах, у цэлым абстаноўка спакойная і не выклікае заклапочанасці. "Кіраўнік дзяржавы яшчэ раз падкрэсліў, што суддзі павінны быць па-за палітыкай, яны не могуць быць членамі палітычных партый і займацца агітацыяй. І ўсё, што яны робяць, павінна быць у строгай адпаведнасці з Канстытуцыяй і дзеючым заканадаўствам", - дадаў Валянцін Сукала.-0-
