25 сакавіка 2024, 18:04

У бяды няма меж. Беларусы пакідаюць запісы ў кнізе спачуванняў

25 сакавіка, Мінск /Кар. БЕЛТА/. Кніга спачуванняў у сувязі з тэрактам у Падмаскоўі адкрыта ў пасольстве Расійскай Федэрацыі ў Мінску, паведамляе БЕЛТА.

Спікер верхняй палаты беларускага парламента Наталля Качанава падкрэсліла, што члены Савета Рэспублікі Нацыянальнага сходу з глыбокім болем успрынялі вестку аб жорсткім крывавым тэрарыстычным акце.

"Гэта зверскае злачынства ўзрушыла і шакіравала ўсю Беларусь. Пачуцці, слёзы і горыч, якія перапаўняюць беларускіх грамадзян, увасобіліся ў шматлікія спантанныя акцыі салідарнасці і сцены смутку, сардэчную падтрымку з усіх куткоў нашай краіны. Гэтаму жахліваму злачынству супраць чалавечнасці няма і не можа быць ніякага апраўдання. Вінаватыя павінны панесці заслужанае пакаранне, - гаворыцца ў запісе, пакінутым у кнізе спачуванняў. - Смуткуем аб ахвярах тэракта і спадзяёмся на хутчэйшае выздараўленне пацярпелых. У гэты складаны час жадаем усім стойкасці духу, сіл і мужнасці. Беларусь разам з вамі!"

Шчырыя спачуванні родным і блізкім загінулых, падажанні хутчэйшага выздараўлення пацярпелым адрасаваў старшыня Палаты прадстаўнікоў Нацыянальнага сходу Ігар Сергяенка.

"Беларускія дэпутаты, як і ўвесь народ Беларусі, з болем успрынялі вестку аб жахлівым тэракце ў канцэртнай зале "Крокус Сіці Хол" у Падмаскоўі, які прывёў да шматлікіх чалавечых ахвяр, сярод якіх ёсць дзеці. У гэты цяжкі час разам з расіянамі нас перапаўняюць пачуцці смутку і спагады, - гаворыцца ў спачуванні. - Рашуча асуджаем забойства мірных грамадзян і заяўляем, што тэрарызму не можа быць ніякага апраўдання. Перакананы, што ўсе адказныя за планаванне, арганізацыю і ажыццяўленне гэтага варварскага злачынства панясуць непазбежнае пакаранне".

Запіс у кнігу спачуванняў таксама зрабіў старшыня Палаты прадстаўнікоў IV, V, VI і VII скліканняў Уладзімір Андрэйчанка.

Наталля Качанава, Ігар Сергяенка і Уладзімір Андрэйчанка разам прыйшлі ў пасольства Расіі.

"Бечалавечнасці тэрарыстаў няма апраўдання. Агульны боль, агульная бяда", - такія словы можна прачытаць у кнізе спачуванняў, запіс у якой пакінулі намеснік прэм'ер-міністра Ігар Петрышэнка і кіраўнік Апарату Савета Міністраў Канстанцін Бурак.

Першы намеснік генеральнага сакратара СНД Леанід Анфімаў акцэнтаваў увагу на важнасці дасканалага расследавання ўчыненага злачынства. "У такую хвіліну вельмі складана гаварыць. Гэту жахлівую акцыю, якую ўчынілі тэрарысты, спрабуючы запалохаць прагрэсіўнае чалавецтва, немагчыма неяк апраўдаць або растлумачыць. Але ў свеце ўсё ж такі больш добрых людзей", - падкрэсліў ён.

Тое, што адбылося ў "Крокус Сіці Холе", Леанід Анфімаў назваў абсалютна бесчалавечным учынкам. "Насілле над мірнымі грамадзянамі, а тэрарысты ведалі, што там знаходзяцца бяззбройныя людзі… гэта было проста паляванне на людзей. Інакш як сярэдневяковым варварствам гэта назваць немагчыма. Звяры так не робяць, як зрабілі гэтыя людзі", - сказаў першы намеснік генеральнага сакратара СНД.

Ён адзначыў важнасць раскрыцця ўсіх дэталей злачынства. "За непасрэднымі выканаўцамі гэтай акцыі нехта стаіць, - дадаў Леанід Анфімаў. - Я думаю, што іх паказанні (затрыманых. - Заўвага БЕЛТА) лягуць у аснову правядзення дасканалага расследавання. Гэта дасць магчымасць зрабіць ацэнку таму, што сёння адбываецца ў свеце: хто арганізуе такія акцыі тэрарызму і стаіць за тэрарыстамі".

Пакінуў запіс у кнізе спачуванняў і Надзвычайны і Паўнамоцны Пасол Палесціны ў Беларусі Ахмед Махамед Алмадбух. Ён адзначыў, што тэрарызм не церпіць ніякіх апраўданняў.

"Мы вельмі асуджаем гэты тэрарыстычны акт. У тэрору няма ні нацыянальнасці, ні рэлігіі. Таму гэтых людзей (выканаўцаў тэракта. - Заўвага БЕЛТА) трэба пакараць у самай строгай форме. Мы смуткуем з расійскім народам, тэрарызм не церпіць ніякіх апраўданняў", - сказаў дыпламат.

У кнізе спачуванняў ёсць і запіс ад прэзідэнта НАК Віктара Лукашэнкі: "Жудасная трагедыя! Мы побач з нашымі братамі-расіянамі! Глыбокія спачуванні сем'ям, родным і блізкім загінулых! Упэўнены, што кампетэнтныя органы ўстановяць і знойдуць усіх вінаватых. І гэтыя злачынцы панясуць заслужаную кару!"

У дзень агульнанацыянальнай жалобы па загінулых у тэракце кіраўнік Прэзідэнцкага спартыўнага клуба Дзмітрый Лукашэнка з членамі сваёй сям'і ўсклалі кветкі да стыхійнага мемарыяла ў памяць аб ахвярах тэракта ў Падмаскоўі побач з "Крокус Сіці Холам".

Запісы ў кнізе спачуванняў пакінулі міністр абароны Віктар Хрэнін, генеральны пракурор Беларусі Андрэй Швед, міністр адукацыі Андрэй Іванец, старшыня Нацыянальнага статыстычнага камітэта Іна Мядзведзева, Упаўнаважаны па справах рэлігій і нацыянальнасцей Аляксандр Румак, старшыня Мусульманскага рэлігійнага аб'яднання ў Беларусі муфтый Абу-Бекір Шабановіч, Беларускай гандлёва-прамысловай палаты Міхаіл Мятлікаў, шматлікія прадстаўнікі дыпламатычнага корпуса.

"Ад імя Міністэрства адукацыі Рэспублікі Беларусь і мяне асабіста выказваем шчырыя словы спачування ў сувязі з трагедыяй у "Крокусе". Смуткуем і падзяляем боль з брацкім расійскім народам! Сілы духу і хутчэйшага выздараўлення пацярпелым!" - напісаў Андрэй Іванец.

Віктар Хрэнін у кнізе спачуванняў адзначыў, што з глыбокім болем і смуткам успрыняў вестку аб тэракце ў Падмаскоўі са шматлікімі чалавечымі ахвярамі: "Трагедыя, якая адбылася, - гэта наш агульны боль, і ў гэту цяжкую хвіліну мы падзяляем горыч страты і смуткуем разам з вамі. Ад імя Міністэрства абароны Рэспублікі Беларусь і сябе асабіста выказваю глыбокія спачуванні брацкаму расійскаму народу, родным і блізкім загінулых у выніку гэтай трагічнай падзеі".

"Глыбокім болем адгукнулася ў нашых сэрцах трагедыя ў Падмаскоўі! - напісаў у кнізе спачуванняў старшыня ЦВК Ігар Карпенка. - Выказваем салідарную падтрымку брацкаму народу Расіі. Смуткуем і молімся па бязвінна забітых у выніку тэрарыстычнага акта. Жадаем хутчэйшага выздараўлення ўсім пацярпелым. У адзінстве і дружбе народаў - наша сіла і праўда!"

"Да глыбіні душы ўзрушаны трагічнымі падзеямі, якія забралі жыцці мірных грамадзян брацкай нам дзяржавы, - гаворыцца ў спачуванні, пакінутым Міхаілам Мятлікавым. - Ад сябе асабіста і ад імя бізнес-супольнасці Беларускай гандлёва-прамысловай палаты выказваю шчырыя спачуванні і падзяляю горыч кожнага, каго закранулі страты. У гэтыя дні мы ўсе шчыра смуткуем разам з народам Расіі. Жадаем сіл, цярпення і хутчэйшага выздараўлення ўсім пацярпелым".

Старшыня Дзяржпагранкамітэта Канстанцін Моластаў падкрэсліў, што ён асабіста і ў ведамстве ў цэлым успрынялі тое, што адбылося, як трагедыю брацкага народа: "Нашы карані, вузы, мы звязаны гісторыяй. Гэты тэрарыстычны акт - нешта жудаснае не толькі для расіян, але і для беларусаў".

Кіраўнік ДПК расказаў, што пасля тэракта аператыўна было наладжана ўзаемадзеянне ў тым ліку паміж органамі пагранслужбы Беларусі і прыгранічнымі ўпраўленнямі пагранслужбы ФСБ Расіі. "Пастаянна былі на сувязі, падключаліся да пошуку ў тым ліку. І былі гатовы да рознага ходу падзей", - сказаў ён.

"Нішто і ніколі не можа апраўдаць жудаснае насілле", - падкрэсліў Канстанцін Моластаў у запісе, які пакінуў у кнізе спачуванняў у пасольстве Расіі ў Мінску.

Намеснік міністра замежных спраў Ігар Назарук таксама пакінуў запіс у кнізе спачуванняў. "Гэта наша агульнае гора, і мы перажывём яго разам - з'яднана і з годнасцю, як належыць братам. Рашуча асуджаем жорсткае забойства бязвінных людзей і заяўляем, што тэрарызму ў любых яго праявах не можа быць апраўдання. Перакананы, што ўсе вінаватыя ў гэтым жахлівым злачынстве, яго натхняльнікі, арганізатары і памагатыя будуць устаноўлены і панясуць справядлівае пакаранне", - напісаў ён.

Словы спачуванняў выказваюць і прафсаюзныя дзеячы. У іх ліку старшыня Беларускага прафесійнага саюза работнікаў гандлю, спажывецкай кааперацыі і прадпрымальніцтва Аксана Герашчанка і старшыня Беларускага прафесійнага саюза работнікаў хімічнай, горнай і нафтавай галін прамысловасці Святлана Клачок.

Ад імя Рэспубліканскай асацыяцыі прадпрыемстваў прамысловасці "БелАПП" запіс у кнізе спачуванняў пакінуў першы намеснік старшыні Аляксандр Панасюк.

Жадаючых выказаць свае спачуванні з кожнай гадзінай становіцца ўсё больш. Кніга спачуванняў будзе адкрыта ў пасольстве Расійскай Федэрацыі ў Мінску 25 і 26 сакавіка. Запіс у ёй могуць пакінуць афіцыйныя асобы Рэспублікі Беларусь і прадстаўнікі грамадскіх арганізацый і аб'яднанняў.-0-