(Абноўлена)
Беларусы сёння займаліся азеляненнем, добраўпарадкаваннем і прывядзеннем у належны стан аб'ектаў і тэрыторый населеных пунктаў, знакавых аб'ектаў, гісторыка-культурных каштоўнасцей, мемарыяльных комплексаў, месцаў баявой і воінскай славы, пахаванняў воінаў і партызан часоў Вялікай Айчыннай вайны. Таксама суботнік можна было правесці на рабочых месцах.
Міністэрствы і ведамствы краіны актыўна прынялі ўдзел у суботніку.Рэспубліканскі суботнік - традыцыя, якой ва Узброеных Сілах Беларусі прытрымліваюцца ў любое надвор'е. Міністр абароны Віктар Хрэнін і памочнік міністра абароны па ідэалагічнай рабоце ва Узброеных Сілах - начальнік галоўнага ўпраўлення ідэалагічнай работы Мінабароны Леанід Касінскі працавалі на тэрыторыі спартыўна-стралковага комплексу імя маршала Савецкага Саюза С. К. Цімашэнкі. Тут плануецца высадзіць больш за тры дзясяткі маладых туй, навесці парадак на прылеглай тэрыторыі. Плячо ў плячо з кіраўніком ведамства працавалі і юныя абаронцы Айчыны выхаванцы Мінскага сувораўскага ваеннага вучылішча. У злучэннях і воінскіх часцях ваеннаслужачыя таксама прымалі ўдзел у добраўпарадкаванні замацаваных тэрыторый.
Работнікі Міністэрства аховы здароўя на чале з міністрам Аляксандрам Хаджаевым таксама прымалі актыўны ўдзел у рэспубліканскім суботніку. Рукі сёння спатрэбіліся на ўзвядзенні новага корпуса РНПЦ дзіцячай анкалогіі, гематалогіі і імуналогіі. Тут ідзе мантаж гіпсакардонных канструкцый у кансультацыйна-паліклінічным аддзяленні цэнтра. "Цяпер у сістэме аховы здароўя ўзводзіцца шмат аб'ектаў, каля 80 абнаўляецца ў рамках капрамонту. Ключавыя - гэта абласныя бальніцы ў Бараўлянах, Віцебску і Брэсце, якія набываюць абсалютна новы выгляд і будуць напоўнены новым тэхналагічным абсталяваннем. Гэтыя ўстановы будуць адпавядаць усім сучасным стандартам. Нават надвор'е не можа перашкодзіць нашым супрацоўнікам дамагчы будаўнікам паскорыць працэс узвядзення аб'екта", - падкрэсліў Аляксандр Хаджаеў.
У гэтым годзе Міністэрства прамысловасці ўпершыню ў сваёй гісторыі апрабавала новы фармат, калі міністр і яго намеснікі працавалі на тэрыторыях розных прадпрыемстваў сістэмы Мінпрама - ААТ "Мінскі падшыпнікавы завод", ААТ "Планар", ААТ "МЭТЗ імя В.І.Казлова", ААТ "АМКАДОР". У дапамогу ім выйшлі супрацоўнікі цэнтральнага апарату ведамства.
"Гэта мерапрыемства - не проста магчымасць папрацаваць разам, але і важны крок да стварэння новага фармату ўзаемадзеяння нашага міністэрства з прадпрыемствамі галіны ў рамках удзелу ў рэспубліканскім суботніку. Галоўная мэта - максімальны ахоп і ўключанасць. Мы імкнуліся да таго, каб кожны работнік усвядоміў сваю ролю і ўнёс свой уклад у добраўпарадкаванне. Такім чынам, усе работнікі Мінпрама - ад кіраўніцтва да супрацоўнікаў - разам з кіраўніцтвам і работнікамі прадпрыемстваў Мінпрама сёння на сваіх тэрыторыях працавацьлі не толькі па навядзенні парадку, але і прадэманстравалі адзінства і з'яднанасць нашай вялікай прамысловай каманды", - пракаменціраваў міністр прамысловасці. Усяго ў рэспубліканскім суботніку прынялі ўдзел каля 100 тыс работнікаў сістэмы Мінпрама.
Больш за 100 прадстаўнікоў Камітэта дзяржаўнага кантролю сёння прымалі ўдзел у пасадцы лесу на тэрыторыі Валожынскага лясгаса. Тут за некалькі гадзін было пасаджана больш за 3 га лесу - сосны, елкі і бярозы. Работнікі кантралюючага ведамства з году ў год дапамагаюць аднаўляць беларускія лясы. Гэта субота не стала выключэннем, нягледзячы на непагоду. "Кожны год прымаем удзел. Палавіна людзей працуе ў горадзе, палавіна - на пасадцы лесу. Ужо нібы конкурсны адбор, хто паедзе саджаць лес, таму што сюды хоча ехаць больш людзей. Надвор'е нам не магло перашкодзіць. Хочам праехаць па тых участках, дзе мы ўжо садзілі раней, паглядзець, што там, можа, трэба нешта дарабіць", - адзначыў старшыня Камітэта дзяржаўнага кантролю Васіль Герасімаў. Таксама работнікі КДК сёння займаліся прыбіраннем паркавай зоны Сляпянскай воднай сістэмы. Акрамя таго, спецыялісты кантралюючага ведамства ўдзельнічалі ў рэспубліканскім суботніку ў кожнай з абласцей.
Работнікі Міністэрства па надзвычайных сітуацыях на чале з міністрам Вадзімам Сіняўскім унеслі свой уклад у захаванне прыроды Беларусі, далучыўшыся да рэспубліканскай акцыі "Дай лесу новае жыццё". Разам з вопытнымі ратавальнікамі ў акцыі ўдзельнічала моладзь - члены ваенна-патрыятычнага клуба "Ратавальнік" і прадстаўніцы Саюза жанчын МНС. У Бялыніцкім лясніцтве Магілёўскай вобласці ўдзельнікі акцыі высадзілі больш за 14 тыс. саджанцаў сасны, елкі і вольхі, уносячы асабісты ўклад у лесааднаўленне. Кожны саджанец, пасаджаны рукамі ратавальнікаў, стаў сімвалам клопату пра будучыню беларускай прыроды. У памяць аб акцыі ратавальнікі заклалі памятны камень, які стаў сімвалам іх намаганняў па аднаўленні лясных масіваў.
На рэспубліканскім суботніку ў Белавежскай пушчы працавалі міністр прыродных рэсурсаў і аховы навакольнага асяроддзя Беларусі Сяргей Масляк і першы намеснік старшыні камітэта па экалогіі, прыродных рэсурсах і ахове навакольнага асяроддзя Дзяржаўнай думы Федэральнага сходу Расійскай Федэрацыі, старшыня Усерасійскага таварыства аховы прыроды Вячаслаў Фяцісаў.
Работнікі ЦВК Беларусі працавалі сёння на самай высокай кропцы Беларусі - гары Дзяржынскай. "Суботнік, нягледзячы на дождж, праводзіўся з бадзёрым настроем, таму што сумесная праца на карысць грамадства аб'ядноўвае і дае сілы", - адзначылі ў ЦВК.
Міністэрства сельскай гаспадаркі і харчавання працавала ў чатырох кропках: наводзіла парадак на тэрыторыі стадыёна "Дынама", дапамагала па гаспадарцы ў ДУ "Рэспубліканскі цэнтр алімпійскай падрыхтоўкі коннага спорту і конегадоўлі" ў аграгарадку Ратамка, прыбірала тэрыторыю дома-інтэрната для састарэлых і інвалідаў "Камфортнае жыццё". Таксама работнікі міністэрства на чале з намеснікам міністра Віталем Кулаком прымалі ўдзел у рэспубліканскай акцыі "Дай лесу новае жыццё" і саджалі дрэвы ў Барысаўскім лясгасе.
Супрацоўнікі Міністэрства эканомікі на чале з міністрам Юрыем Чабатаром працавалі ў сацыяльным пансіянаце "Сонечны", якому ведамства аказвае падтрымку ўжо больш за 15 гадоў. Непагода не перашкодзіла эканамістам зрабіць добрую справу і сёння. Прадстаўнікі ведамства прыбіралі апалае лісце на тэрыторыі пансіяната, дапамагалі прыбрацца ў сталовай, іншых памяшканнях.
Калектыў сакратарыята наглядальнага савета ПВТ таксама далучыўся да рэспубліканскага суботніка. Кіраўніцтва і супрацоўнікі навялі парадак вакол адміністрацыйных будынкаў каля МКАД і на вуліцы Акадэміка Купрэвіча, а таксама паклапаціліся аб чысціні сваіх рабочых месцаў.Як і ў мінулыя гады, у суботніку ўдзельнічалі і кампаніі - рэзідэнты ПВТ. У прэс-службе парка адзначылі, што рэспубліканскі суботнік - выдатная магчымасць кожнаму ўнесці асабісты ўклад у паляпшэнне аблічча родных гарадоў і вёсак, робячы іх больш камфортнымі, чыстымі і прывабнымі.
Да другога ў гэтым годзе суботніка далучыліся і супрацоўнікі Белстата, каб унесці свой уклад у добраўпарадкаванне тэрыторый. Калектыў займаўся ачысткай ад апалай лістоты, смецця і сухастою тэрыторый, прылеглых да будынкаў ведамства ў Мінску. Асаблівая ўвага ўдзелена азеляненню ўчасткаў. Работы ўключалі ў сябе пасадку маладых дрэў і кустоў, догляд існуючых насаджэнняў, а таксама падрыхтоўку клумбаў да зімовага перыяду.
Мінінфарм у Год добраўпарадкавання далучыўся да рэспубліканскай акцыі "Дай лесу новае жыццё!" Працоўным дэсантам работнікаў міністэрства і падведамных арганізацый высаджана некалькі тысяч саджанцаў сасны, елкі і вольхі ў Вілейскім раёне. У гэтым годзе да ініцыятывы далучыліся блогеры, якія ўнеслі свой уклад у аднаўленне лясоў Беларусі. Кантэнтмейкеры сваім прыкладам паказалі, як важна берагчы нашу прыроду, выклікаўшы ў сацсетках жывы інтарэс і натхніўшы многіх на асабісты ўклад у ахову навакольнага асяроддзя.
Старшыня Дзяржстандарту Алена Маргунова сёння працавала на рэспубліканскім суботніку на сваёй радзіме - у Магілёве. Разам з мэрам горада Сяргеем Чартковым, кіраўніцтвам Магілёўскага гарвыканкама, дэпутацкім корпусам яна прыняла ўдзел у пасадцы дрэў на бульвары Непакорных. Бульвар пацярпеў у час урагану ў гэтым годзе, і магіляўчане прадаўжаюць азеляняць горад, каб ён радаваў жыхароў і гасцей сваёй прыгажосцю і ўтульнасцю.
Таксама Алена Маргунова далучылася да калектываў Магілёўскага ЦСМС, Магілёўскай абласной інспекцыі, упраўлення па наглядзе за рацыянальным выкарыстаннем паліўна-энергетычных рэсурсаў і інспекцыі Дзяржбуднагляду па Магілёўскай вобласці. Дзякуючы сумесным намаганням у вёсцы Галынец Магілёўскага раёна на дзялянцы памерам адзін гектар вырасце новы лес. Пасадка саджанцаў праходзіла пад куратарствам Чамяранскага лясніцтва Магілёўскага лясгаса. У гэтых месцах, пацярпелых ад урагану, сёння высаджаны 2 тыс. саджанцаў елкі і сасны.
Суботнік праходзілі і на рабочых месцах. Так, супрацоўнікі апарата канцэрна "Белнафтахім" сёння працавалі ў офісе. Акрамя таго, у традыцыйнай акцыі па навядзенні парадку прымалі ўдзел работнікі кампаніі "Беларуснафта" па ўсёй краіне. Нафтавікі працавалі не толькі на замацаваных тэрыторыях, але і прыводзілі ў парадак населеныя пункты, месцы воінскіх пахаванняў, брацкія магілы ахвяр фашызму і помнікі.
Што датычыцца прадпрыемства "Гродна Азота", адміністрацыя на чале з генеральным дырэктарам Ігарам Ляшэнкам сумесна з кіраўнікамі падраздзяленняў і актывам прафсаюзнага камітэта праводзілі актыўную работу па расчыстцы тэрыторыі, прылеглай да санаторыя "Жамчужына" і лагера "Купалінка".
Каля 40 тыс. работнікаў сістэмы сацабароны выйшлі на рэспубліканскі суботнік. У ім удзельнічалі ўсе падраздзяленні і падпарадкаваныя арганізацыі ведамства. Цэнтральны апарат Міністэрства працы і сацыяльнай абароны выйшаў на суботнік адразу па некалькіх напрамках. Міністр Наталля Паўлючэнка і яе намеснік Алег Такун уносілі свой уклад у азеляненне і захаванне прыроднай спадчыны краіны - разам з калектывам міністэрства яны ўдзельнічалі ў пасадцы лесу ў Кайкаўскім лясніцтве. Першы намеснік міністра Таццяна Астрэйка кіравала работамі ў скверы Марата Казея. Намеснікі міністра Юлія Берднікава і Марына Арцёменка дапамагалі з прыбіраннем і добраўпарадкаваннем у сталічным сацыяльным пансіянаце "Гармонія". Кіраўнік ФСАН Вадзім Шапялевіч і яго намеснік Кацярына Ліхачова займаліся добраўпарадкаваннем брацкай магілы чатырох танкістаў-вызваліцеляў і брацкай магілы савецкіх воінаў, партызан і мірных жыхароў, закатаваных у час Вялікай Айчыннай вайны, з узведзеным у 1947 годзе помнікам з суцэльнага мармуру.
Рэспубліканскі суботнік у Вярхоўным Судзе падтрымалі на рабочых месцах. Сабраныя грашовыя сродкі будуць перададзены на патрэбы краіны.
Да ўдзелу ў рэспубліканскім суботніку далучыўся канцэрн "Белдзяржхарчпрам". Члены калектыву апарату канцэрна прыбралі паркавую зону на праспекце Ракасоўскага ў Мінску. Больш за 60 супрацоўнікаў ААТ "Чырвоны харчавік" на чале з дырэктарам Ігарам Кісялём прывялі ў парадак рабочыя месцы. Работнікі ААТ "Машхарчпрам" на чале з дырэктарам Дзмітрыем Лімаравым папрацавалі ў парку імя Л.Гайдучонак у горадзе Мар'іна Горка. Супрацоўнікі СП ААТ "Спартак" таксама прынялі актыўны ўдзел у суботніку. Наведзены парадак на рабочых месцах, прылеглай тэрыторыі, асаблівая ўвага ўдзелена мемарыялу ўдзельнікам Вялікай Айчыннай вайны - былым работнікам фабрыкі. Работнікі ААТ "Кандытарская фабрыка "Слодыч" прывялі ў належны стан не толькі рабочыя месцы, але і дваровую тэрыторыю прадпрыемства.
У ходзе рэспубліканскага суботніка супрацоўнікі апарату канцэрна "Беллеспаперапрам" прынялі ўдзел у прыбіранні сталічнага сада Гашкевіча, а таксама навялі парадак на сваіх рабочых месцах.
Работнікі МЖКГ, кіраўнікі падпарадкаваных арганізацый аднавілі бураломны ўчастак плошчай 1,5 га, высадзіўшы елку і сасну, у Валмянскім лясніцтве Чэрвеньскага лясгаса.
Таксама Генадзь Трубіла заклікаў кожнага жыхара Беларусі далучацца да суботнікаў і ініцыятыў Міністэрства жыллёва-камунальнай гаспадаркі па навядзенні парадку на роднай зямлі.
Уся спартыўная галіна актыўна прымала ўдзел у рэспубліканскім суботніку. Супрацоўнікі Міністэрства спорту і турызму, а таксама падпарадкаваныя яму арганізацыі прыводзілі ў належны стан розныя спартыўныя аб'екты і прылеглыя да іх тэрыторыі. Таксама ў лесапарку Мядзвежына Фрунзенскага раёна Мінска праводзілася добраўпарадкаванне тэрыторыі, прыбіранне галінак паваленых дрэў для стварэння ўмоў для заняткаў фізічнай культурай і спортам.
Калектыў Міністэрства юстыцыі на чале з Яўгенам Каваленкам сёння прыняў удзел у рэспубліканскім суботніку на базе Беларускага дзяржаўнага архіва кінафотафонадакументаў. Працоўны дэсант з ліку прадстаўнікоў цэнтральнага апарату аказаўся вельмі дарэчы - цяпер у архіве праводзіцца капітальны рамонт, які плануецца завяршыць у наступным годзе.
"Дзяржаўны архіў у Дзяржынску - унікальная ў пэўным сэнсе ўстанова. Менавіта тут, што называецца, гісторыя застыла ў кадры. Забяспечваючы захоўванне старых кінаматэрыялаў, фотадакументаў, архівісты захоўваюць гісторыю нашай дзяржавы, гістарычную памяць беларускага народа", - падкрэсліў міністр юстыцыі.
Адной з асноўных задач сённяшняга суботніка стала азеляненне тэрыторыі. Яшчэ ў 2023 годзе на тэрыторыі архіва кінафотафонадакументаў быў закладзены яблыневы сад. Усе дрэвы паспяхова прыжыліся. У гэтым годзе было прынята рашэнне на суботніку дасадзіць новыя яблыні. Акрамя таго, работнікі Міністэрства юстыцыі і архіва дружна ўзяліся за навядзенне парадку на тэрыторыі і ў памяшканнях установы.
З грашовых сродкаў, заробленых ад правядзення асенняга суботніка, 50 працэнтаў пойдуць на будаўніцтва Нацыянальнага гістарычнага музея Беларусі і стварэнне яго пастаяннай экспазіцыі. Яшчэ 50 працэнтаў застануцца ў распараджэнні аблвыканкамаў, Мінскага гарвыканкама з магчымасцю іх накіравання на канкрэтныя аб'екты.-0-
Падпісвайцеся на нас у
