ДЗЯРЖОРГАНЫДЗЯРЖОРГАНЫ
Флаг Чацвер, 1 снежня 2022
Мінск Малавоблачна -8°C
Усе навіны
Усе навіны
Грамадства
29 верасня 2022, 17:54

Расказваем, аб якіх важных змяненнях у ПДР трэба ведаць вадзіцелям і пешаходам

Фота з архіва
Фота з архіва

Красавіцкім указам нумар 145 "Аб удасканаленні арганізацыі дарожнага руху" скарэкціраваны правілы дарожнага руху. Асноўная частка змяненняў уступае ў сілу з 27 кастрычніка. Разбіраемся разам з начальнікам аддзялення ГУ ДАІ МУС Веранікай Раманьковай, на што ў абноўленым дакуменце вадзіцелям і пешаходам варта звярнуць асаблівую ўвагу.

Аматарам СПМ

Электрасамакаты, гіраскутары, монаколы, сегвеі і іншая тэхніка ў дакуменце названа сродкамі персанальнай мабільнасці (СПМ). Для іх устаноўлена дазволеная скорасць - не вышэйшая за 25 км/гадз. Карыстацца такімі ўстройствамі можна будзе з 14 гадоў, хоць гэта правіла не распаўсюджваецца на жылыя і пешаходныя зоны. Тым, хто перамяшчаецца на СПМ, забараняецца знаходзіцца ў стане ап'янення, перавозіць каго-небудзь на неабсталяваных месцах для сядзення, не трымацца за руль. "Эспээмы" не лічацца транспартнымі сродкамі, але пры гэтым у іх павінны быць спраўныя тармазы і руль. Ім дазволена ездзіць па абочынах, вела- і пешаходнай дарожцы, а пры яе адсутнасці - па тратуары, не ствараючы перашкод для пешаходаў.

З ветрыкам

Павышаецца дазволеная скорасць на аўтамагістралях і дарогах для аўтамабіляў са 110 да 120 км/гадз, для аўтобусаў - да 100 км/гадз. Звярніце ўвагу! Гэта датычыцца не ўсіх загарадных дарог.

З маячком або без?

Дапускаецца спыненне аўтамабіля супрацоўнікамі органаў унутраных спраў у цёмны час сутак па-за населенымі пунктамі на спецаўтамабілях без уключанага маячка. Размова ідзе аб тых выпадках, калі праваахоўнікі нясуць службу па забеспячэнні праезду транспартных сродкаў, якія выкарыстоўваюцца для транспартнага абслугоўвання, суправаджэння і забеспячэння бяспекі службовых асоб, якія падпадаюць пад дзяржаўную ахову ў адпаведнасці з заканадаўчымі актамі, грамадскай бяспекі і бяспекі дарожнага руху ў месцах правядзення масавых мерапрыемстваў.

Для вас, "электрычкі"

Электрамабілям дазволяць ехаць па выдзеленай для грамадскага транспарту паласе. Уводзіцца забарона на паркоўку ў месцах, абсталяваных станцыямі для зарадкі электрамабіляў. Адпаведна, калі аўтамабіль з рухавіком унутранага згарання або іншы электрамабіль, які не зараджаецца, будуць стаяць на такім месцы, гэта з'яўляецца парушэннем, і ў такім выпадку прадугледжана эвакуацыя транспартнага сродку.

Паняцце "рэгуліроўшчык"

Скарэкціравана паняцце "рэгуліроўшчык". Да яго ў тым ліку будуць прыраўноўвацца супрацоўнікі Дзяржпагранкамітэта пры забеспячэнні руху арганізаваных транспартных калон, а таксама работнікі дарожна-эксплуатацыйных службаў, дзяжурных на чыгуначных пераездах і паромных пераправах у адзенні са святловяртальнага матэрыялу, з дыскам з чырвоным сігналам пры выкананні імі сваіх службовых абавязкаў.

Асцярожна, скрыжаванне!

З гэтага часу пры выездзе на скрыжаванне, дзе арганізаваны кругавы рух, падача сігналу светлавымі ўказальнікамі павароту не ажыццяўляецца. Пры руху ў напрамку стрэлкі, уключанай у дадатковай секцыі адначасова з зялёным сігналам святлафора, вадзіцель мае перавагу перад транспартнымі сродкамі, якія рухаюцца з іншых напрамкаў.

Прад'явіць інспектару

У ПДР дакладна прапісана, якія менавіта дакументы вадзіцель абавязаны мець пры сабе. Да іх адносяцца адпаведнае вадзіцельскае пасведчанне, пасведчанне аб рэгістрацыі (тэхнічны пашпарт, тэхнічны талон), а таксама дакументы, якія пацвярджаюць правамернасць устаноўкі апазнавальнага знака "Інвалід" пры яго наяўнасці на ТС, за выключэннем замежных грамадзян і асоб без грамадзянства.

Дакументы аб тэхаглядзе вазіць з сабой не абавязкова, як, урэшце, і страхоўку, калі яна заключана ў электронным выглядзе. Замест правоў можна прадаставіць біяметрычны дакумент (ідэнтыфікацыйную картку грамадзяніна).

Ды будзе святло

Дакладна прапісваецца перыяд, калі ў светлы час сутак для абазначэння транспартнага сродку павінны быць уключаны блізкае святло фар або дзённыя хадавыя агні - штогод з 25 мая па 5 чэрвеня і з 25 жніўня па 5 верасня.

Не спешвайцеся

Веласіпедыстам, згодна з новымі правіламі, можна не спешвацца пры перасячэнні праезнай часткі дарогі. Аднак, пад'язджаючы да скрыжавання з праезнай часткай дарогі, трэба пераканацца ў бяспецы, загадзя знізіць скорасць руху і перасякаць яе са скорасцю пешахода. Рух двухколавых па праезнай частцы незалежна ад наяўнасці веласіпеднай дарожкі, абочыны, тратуара або пешаходнай дарожкі можа ажыццяўляцца ў зоне з абмежаваннем максімальнай скорасці руху не далей за 1 метр ад яе правага краю ў адзін рад.

У жылой і пешаходнай зонах, на прылеглай тэрыторыі ездзіць на веласіпедзе дазваляецца па тратуары, абочыне і па праезнай частцы дарогі. Пры руху па дарозе ў цёмны час сутак або пры яе недастатковай бачнасці па-за населенымі пунктамі веласіпедыст павінен быць у адзенні са святловяртальнымі элементамі.

Наш каментарый

Начальнік аддзялення ГУ ДАІ МУС Аляксандр Шаўчэнка:

- Прадугледжаныя карэкціроўкі накіраваны на прывядзенне асобных палажэнняў Правіл дарожнага руху ў адпаведнасць з патрабаваннямі тэхнічнага рэгламенту Мытнага саюза "Аб бяспецы колавых транспартных сродкаў". Так, упарадкавана выкарыстанне транспартных сродкаў і прыстасаванняў, якія маюць у якасці рухавіка электрычную сілавую ўстаноўку, створаны ўмовы для больш актыўнага выкарыстання веласіпедаў, пашыраны пералік дарожных знакаў і разметкі, прымяненне якіх зробіць больш інфарматыўнымі дарогі і вуліцы населеных пунктаў. У дакуменце ўсё прапісана такім чынам, каб выключыць канфліктныя сітуацыі, якія ўзнікаюць на аснове рознага тлумачэння палажэнняў Правіл дарожнага руху ўдзельнікамі дарожнага руху, а таксама супрацоўнікамі ДАІ. Цяпер і пешаходы, і вадзіцелі змогуць больш аднастайна і дакладна разумець свае правы і абавязкі на дарозе. Пашыраны таксама пералік дарожных знакаў і разметкі, прымяненне якіх зробіць больш інфарматыўнымі нашы дарогі і вуліцы. Інакш кажучы, сэнс і мэта прынятых новаўвядзенняў - зніжэнне колькасці ДТЗ і павышэнне культуры ўдзельнікаў дарожнага руху.

Ангеліна СВЯТЛОВА,

фота - БЕЛТА і з адкрытых інтэрнэт-крыніц,

газета "7 дней".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі