7 студзеня, Мінск /Кар. БЕЛТА/. Праваслаўныя вернікі 7 студзеня адзначаюць вялікае свята - Раство Хрыстова. Святыя айцы ў сваіх пісаннях называюць Раство пачаткам і падставай для іншых свят.
Згодна з Евангеллем, Ісус Хрыстос нарадзіўся ў горадзе Віфлееме. Старазапаветныя прарокі яшчэ за некалькі стагоддзяў да гэтага прадказвалі час і месца нараджэння Збавіцеля. Па распараджэнні рымскага імператара Аўгуста (Актавія) быў арганізаваны перапіс насельніцтва. Марыя і Іосіф Абручнік павінны былі ісці ў Віфлеем, каб унесці свае імёны ў спіс. Усе гасцініцы і заезныя двары Віфлеема былі перапоўнены. Марыя і Іосіф змаглі знайсці начлег толькі ў пячоры, што выкарыстоўвалася ў якасці хлява для жывёлы. Менавіта тут і наканавана было нарадзіцца Збавіцелю свету.
Першымі людзьмі, якія прыйшлі пакланіцца Збавіцелю, сталі пастухі. Да якіх з'явіўся анёл і паведаміў радасную вестку. Следам на паклон прыйшлі ўсходнія мудрацы - вешчуны, якіх да нованароджанага немаўляці прывяла Віфлеемская зорка, што загарэлася на небе. Яна спынілася і апусцілася зусім нізка над пячорай, дзе было немаўля - Ісус. Вешчуны пакланіліся немаўляці і яго маці, а затым паднеслі падарункі: золата, ладан і смірну. Золата было прынесена Ісусу як цару, ладан - як Богу, а смірна - як смяротнаму чалавеку.
Згодна з праваслаўнай традыцыяй, перад Раством захоўваецца Калядны (Філіпаў) пост. Пачынаецца ён 28 лістапада і доўжыцца сорак дзён да 6 студзеня ўключна. Царква вучыць, што веруючаму чалавеку пост неабходны, каб настроіць сябе на сустрэчу Нараджэння Хрыста, усвядоміць тайну Богаўцялеснення. У гэты час асаблівую ўвагу неабходна ўдзяліць сваёй душы. Добраахвотна адмаўляючыся ад скаромнай ежы і забаў, удзяляючы больш часу малітве і добрым справам, мы ачышчаем сваю душу, каб у супакаенні сустрэць самае светлае зімовае свята.
Царква гаворыць, што ў свята Божага Нараджэння чалавек прыміраецца з Богам. Усю ноч у праваслаўных цэрквах доўжыцца богаслужэнне, а раніцай 7 студзеня людзі віншуюць адзін аднаго з Раством Хрыстовым.
Дванаццаць наступных дзён пасля Раства называюцца святымі днямі, або святкамі (да 17 студзеня). Пост у гэтыя дні адмяняецца. Святкі - гэта не толькі радасць і весялосць, нашы продкі на святкі рабілі справы міласэрнасці, выконваючы запаведзі Збавіцеля: "Будзьце міласэрныя, як і Айцец ваш міласэрны".-0-
