28 кастрычніка, Мінск /Кар. БЕЛТА/. Прафсаюзныя пярвічкі плануецца актыўней ствараць у ІТ-сектары, паведаміў старшыня федэрацыі Міхаіл Орда ў Мінску на форуме для журналістаў рэгіянальных СМІ, перадае карэспандэнт БЕЛТА.
"Прафсаюзныя арганізацыі працуюць ва ўсіх сферах эканомікі - ад культуры і адукацыі да прамысловасці і энергетыкі. Цяпер мы актыўна ствараем пярвічныя прафсаюзныя арганізацыі ў ІТ-сферы, у Парку высокіх тэхналогій. Тэма вельмі новая", - сказаў Міхаіл Орда.
Паводле яго слоў, дзейнасць работнікаў ІТ-сектара не ўкладваецца ў агульнапрынятыя рамкі, у прыватнасці 8-гадзінны працоўны дзень. Часта людзі не маюць традыцыйнага працоўнага месца, а выконваюць сваю работу аддалена, аператыўна выконваючы заказы. Паводле слоў старшыні ФПБ, важна абараніць работнікаў у плане пенсійнага забеспячэння, аздараўлення і інш.
З улікам гэтай практыкі ў краіне ўжо створана прававая база. У абноўлены Працоўны кодэкс уключана новая глава, якая датычыцца аддаленай работы.
Сусветны прафсаюзны рух цяпер таксама заклапочаны пытаннем абароны работнікаў ІТ-сферы, дадаў Міхаіл Орда.
Форум "Выбары-2019: роля рэгіянальных СМІ ў фарміраванні грамадскай думкі па пытаннях выбарчай кампаніі" сабраў у Мінску каля 150 журналістаў рэгіянальных СМІ. Мерапрыемства, арганізаванае ФПБ пры падтрымцы Міністэрства інфармацыі, праходзіць у штаб-кватэры Нацыянальнага прафцэнтра.
Такое мерапрыемства Федэрацыя прафсаюзаў праводзіць ужо чацвёрты раз. Удзельнікі абмяркоўваюць формы і метады ўзаемадзеяння сацыяльных партнёраў, актуальныя падзеі ў сацыяльным жыцці краіны і сучасныя тэндэнцыі ў інфармацыйнай прасторы. У бягучым годзе арганізатары ўдзеляць асаблівую ўвагу пытанням журналісцкай работы ў час выбарчай кампаніі: формам узаемадзеяння рэдакцый з кандыдатамі, партыямі і грамадскімі аб'яднаннямі, прававым аспектам асвятлення выбарчай кампаніі ў СМІ.-0-
