27 сакавіка, Шклоў /Кар. БЕЛТА/. Пілотны праект па забеспячэнні электратранспартам будзе прадаўжацца. Аб гэтым журналістам расказаў намеснік прэм'ер-міністра Пётр Пархомчык у час урачыстай перадачы Шклоўскаму раёну 15 пасажырскіх электробусаў, перадае карэспандэнт БЕЛТА.
Ён падзякаваў усім, хто прымаў удзел у рэалізацыі гэтага пілотнага праекта. У іх ліку ААТ "Кіруючая кампанія холдынга "Белкамунмаш", якое займалася вырабам новага пасажырскага транспарту для жыхароў Шклоўскага раёна. А таксама - Міністэрства прамысловасці, "Белэнерга", ААТ "Магілёўаблаўтатранс".На рэалізацыю гэтага праекта ўрад выдзеліў Br23 млн.
"Для свайго пілотнага праекта мы выбралі два гарады - Шклоў у Магілёўскай і Жодзіна ў Мінскай абласцях. Удзельнічаюць вытворцы пасажырскай тэхнікі - Мінскі аўтамабільны завод і "Белкамунмаш". Прычым мы падзялілі іх - электробусы ад "Белкамунмаша" будуць працаваць у Шклоўскім раёне, а Мінскага аўтамабільнага завода - у Жодзіне. Нам важна атрымаць пацвярджэнне ўсіх тэхнічных характарыстык, якія былі закладзены канструктарамі, - адзначыў Пётр Пархомчык. - У нашай рэспубліцы прынята вельмі сур'ёзная праграма па электратранспарце да 2025 года ўключна. Цяпер яна атрымлівае сваё развіццё на 25-30-я гады".
Як адзначыў віцэ-прэм'ер, пілотны праект у Шклоўскім раёне мае не толькі практычны, але і рэкламны характар. Можна шмат расказваць аб тым, якую тэхніку вырабляюць у Беларусі, але будзе намнога лепш, калі дэлегацыі з Расійскай Федэрацыі змогуць на практыцы ацаніць работу такога пасажырскага транспарту.
Новыя пасажырскія электробусы ў Шклоўскім раёне будуць курсіраваць па 3 гарадскіх і 19 прыгарадных маршрутах.-0-
Фота Алега Файніцкага
