21 лістапада, Гомель /Кар. БЕЛТА/. Па выніках уступнай кампаніі 2022 года па мэтавых дагаворах у аграрныя ВНУ і ССНУ ад Гомельскай вобласці накіраваны 266 чалавек. Аб гэтым паведаміў сёння на апаратнай нарадзе ў аблвыканкаме старшыня камітэта па сельскай гаспадарцы і харчаванні Дзмітрый Петражыцкі, перадае карэспандэнт БЕЛТА.
Кіраўнік аблсельгасхарча адзначыў: каб запоўніць існуючыя ў сельгасарганізацыях вобласці вакансіі, у рэгіёне праводзяць прафарыентацыю моладзі для паступлення ў аграрныя ВНУ і каледжы па мэтавых дагаворах. "Па выніках уступнай кампаніі 2022 года ў ВНУ на навучанне па мэтавых дагаворах накіраваны 150 чалавек, у ССНУ - 116", - агучыў лічбы ён.
Прафарыентацыя прадаўжаецца, і ў верасні-лістападзе ў рэгіёне правялі амаль 90 сустрэч з вучнямі 9-11 класаў. Цікавасць да паступлення ў навучальныя ўстановы сельскагаспадарчага профілю праявілі каля 40 чалавек. Напрыклад, у Брагінскім раёне са школьнікамі сустрэліся кіраўнікі ўсіх мясцовых сельгасарганізацый. Як вынік - ужо заключаны 3 мэтавыя дагаворы на навучанне.
Старшыня Гомельскага аблвыканкама Іван Крупко падкрэсліў важнасць такіх сустрэч, дзе кіраўнікі агучваюць прапановы па навучанні па мэтавых накіраваннях і далейшым працаўладкаванні, расказваюць пра розныя магчымасці - напрыклад, атрымліваць дадатковую стыпендыю ў час вучобы, праходзіць практыку і г.д. "У нас ёсць магчымасці, каб рыхтаваць неабходныя кадры. Без кадраў нічога не атрымаецца", - дадаў ён.
Дзмітрый Петражыцкі звярнуў увагу, што з лістапада пачаліся размеркаванні выпускнікоў у вышэйшых і сярэдніх спецыяльных установах адукацыі. Паводле яго інфармацыі, у 2023 годзе ў сельгасарганізацыі рэгіёна накіруюць 54 ветэрынарныя ўрачы з вышэйшай адукацыяй і 75 з сярэдняй спецыяльнай, заатэхнікаў - 21 і 55, аграномаў - 32 і 99, маладых спецыялістаў інжынернага профілю - 48 і 195. Гэта дазволіць у поўным аб'ёме закрыць вакансіі інжынернай і агранамічнай службаў, удакладніў кіраўнік аблсельгасхарча.-0-
