11 сакавіка, Мінск /Кар. БЕЛТА/. У мемарыяльным комплексе "Хатынь" будзе ўзведзены новы музейны будынак. Аб гэтым паведаміў журналістам старшыня Мінскага аблвыканкама Аляксандр Турчын, перадае карэспандэнт БЕЛТА.
"Выдзелены сродкі на праект і будаўніцтва новага будынка музея. Акрамя таго, плануецца рэканструкцыя існуючых будынкаў. На мой погляд, у "Хатыні" патрэбны музей, які дае магчымасць сваімі вачамі ўбачыць усе жахі Вялікай Айчыннай вайны і зверствы акупантаў. У Пасланні Прэзідэнта была выказана прапанова правесці гэтыя работы ў фармаце маладзёжнай будоўлі. Ёсць адпаведны пратакол, у якім закранаецца гэта пытанне. З пункту гледжання сувязі пакаленняў гэта рашэнне было б правільным", - лічыць Аляксандр Турчын.
Ён дадаў, што пасля перадачы шпіталя імя Машэрава ў веданне Мінскай вобласці рэжым яго работы не зменіцца. Ветэраны ўсё гэтак жа змогуць атрымаць своечасовую і якасную дапамогу, а колькасць ложкаў для воінаў-інтэрнацыяналістаў будзе павялічана.
"У шпіталі імя Машэрава праходзяць лячэнне як ветэраны Вялікай Айчыннай вайны, так і воіны-інтэрнацыяналісты. З рэспубліканскай установы аховы здароўя ён перакваліфікаваны ў абласную. У рабоце шпіталя нічога не зменіцца. Ветэраны будуць забяспечаны належнай медыцынскай дапамогай. Для воінаў-інтэрнацыяналістаў будуць вылучаны дадатковыя месцы. У век інфармацыйных войнаў асабліва важны людзі з багатым жыццёвым вопытам. Удзельнікі войнаў могуць данесці свае погляды на тыя ці іншыя падзеі сучаснасці. Таму іх работа з моладдзю так важна", - сказаў Аляксандр Турчын.-0-
