16 верасня, Гомель /Корр. БЕЛТА/. Новы апарат ШВЛ папоўніў парк абсталявання Гомельскага абласнога клінічнага анкалагічнага дыспансера, перадае карэспандэнт БЕЛТА.
Сучасны апарат айчыннай вытворчасці перададзены адным з буйнейшых банкаў у рамках сацыяльнага праекта "Дыхай". Размова пра "ВІАН-3-турба", які прызначаны для лячэння пацыентаў з вострай дыхальнай недастатковасцю і каранавіруснай інфекцыяй. "Поўны набор сучасных рэжымаў штучнай вентыляцыі лёгкіх як па аб'ёму, так і ціску забяспечвае максімальны камфорт хворага з мінімізацыяй работы ўласнага дыхання. Такі прыбор падыходзіць для правядзення тэрапіі ў хворых любога ўзросту, у тым ліку нованароджаных", - расказалі мецэнаты.
Абласны анкадыспансер разлічаны на 512 ложкаў, з іх 12 рэанімацыйных. Паводле даных галоўнага ўрача анкалагічнага дыспансера Дзмітрыя Лося, установа адна з першых у рэгіёне ў складаную эпідэміялагічную абстаноўку прыняла на лячэнне пацыентаў з COVID-19.
Так, пяць месяцаў 2020 года і два месяцы бягучага года пад такіх пацыентаў былі перапрафіляваны 180 ложкаў, 9 з якіх - рэанімацыйныя. Паралельна аказвалі планавую дапамогу анкалагічнага профілю. Апараты ШВЛ маюць важнае значэнне для выздараўлення хворых з пашкоджаннем лёгкіх. За гэты перыяд значна ўзрасла нагрузка на абсталяванне ў ходзе барацьбы з эпідэміяй, што паўплывала на яго мотарэсурс. Новы апарат ужо ўстаноўлены ў рэанімацыйным аддзяленні. У бліжэйшы час сюды даставяць пацыента пасля аперацыі па выдаленні пухліны ныркі. Абсталяванне выкарыстоўваецца штодзень, запэўніў галоўны ўрач.
Дзмітрый Лось падкрэсліў асноўныя плюсы айчыннага апарата: "Цяпер мае вялікае значэнне ў сувязі з лагістычнымі складанасцямі тое, што абсталяванне айчыннае. У будучым не будзе праблем з сэрвісам і рамонтам, а таксама пастаўкай запасных частак. Гэта вялікі плюс пры тым, што якасць не ўступае замежным аналагам". Ён адзначыў, што па нарматыве на адзін ложак рэанімацыі прадугледжаны асобны апарат. "І мы яго выконваем", - дадаў галоўны ўрач.
Установы аховы здароўя заўсёды ў поўнай гатоўнасці аказаць неабходную дапамогу. Для гэтага ёсць высокакваліфікаваныя спецыялісты і сучасная матэрыяльна-тэхнічная база, умацаванню якой у рэгіёне ўдзяляецца значная ўвага, растлумачыў намеснік начальніка галоўнага ўпраўлення па ахове здароўя Гомельскага абласнога выканаўчага камітэта Міхаіл Змушко. Паводле яго слоў, у Гомельскай вобласці 273 наркозна-дыхальныя апараты і 551 апарат штучнай вентыляцыі лёгкіх. "Гэта абсталяванне неабходна для аказання дапамогі пацыентам, якія самастойна не могуць дыхаць, як, напрыклад, пры цяжкай форме каранавіруснай інфекцыі і іншых захворванняў. Чалавечае жыццё бясцэннае, таму і дапамога дыспансеру бясцэнная", - сказаў ён.
Апараты ШВЛ "ВІАН-3-турба" перададзены ў Віцебскую абласную клінічную бальніцу і Брэсцкую гарадскую бальніцу нумар 1. У хуткім часе тры партатыўныя апараты ШВЛ і аксігенатэрапіі АІВЛП-2/20-ТМТ будуць дастаўлены ў клінікі Гродна, Магілёва і Мінска. Таксама ў 2021 годзе было набыта абсталяванне і сродкі індывідуальнай аховы для ўстаноў аховы здароўя краіны на Br140 тыс. Як удакладнілі прадстаўнікі банка, сацыяльны праект прадоўжыцца ў наступным годзе.-0-
