Навіны сюжэта
""Марафон адзінства" ў Беларусі "
14 снежня, Баранавічы /Кар. БЕЛТА/. Працаўнікі тылу Баранавіч у гады Вялікай Айчыннай вайны праявілі масавы гераізм і самаахвяраванне. Такое меркаванне выказаў кіраўнік Адміністрацыі Прэзідэнта Дзмітрый Крутой у час рэспубліканскай грамадска-культурнай акцыі "Марафон адзінства" ў Баранавічах, перадае карэспандэнт БЕЛТА.
Дзмітрый Крутой лічыць сімвалічным, што эстафету "Марафону адзінства" ў Оршы перанялі Баранавічы. Гэта таксама буйны транспартны вузел Беларусі. "Думаю, для большасці беларусаў Баранавічы асацыіруюцца менавіта з чыгункай. Бо ў вас на гербе - паравоз, ды і ў самім горадзе на ўсялякі выпадак, напэўна, два дзеючыя вакзалы", - заўважыў Дзмітрый Крутой. У сувязі з гэтым часам узнікаюць сітуацыі, калі пасажыры блытаюць вакзалы. "Ваша аддзяленне чыгункі на ўсіх пяці вузлах перавозіць 30 працэнтаў усіх грузаў унутры Беларусі. Гэта пры тым, што насельніцтва горада крыху менш за 2 працэнты ад нашай рэспублікі", - дадаў кіраўнік Адміністрацыі Прэзідэнта.
Існуе мноства версій, чаму Баранавічы атрымалі менавіта такую назву. "На мой погляд, самая правільная - ад слова "бараніць" (ахоўваць). Горад, нягледзячы на сваю маладосць (вам крыху больш за 150 гадоў), за гэты перыяд прайшоў вельмі шмат цяжкіх выпрабаванняў і сапраўды шмат разоў трымаў абарону", - расказаў Дзмітрый Крутой. Свой след у гісторыі горада пакінула Першая сусветная вайна. З 1921 да 1939 года па ўмовах Рыжскага мірнага дагавора Баранавічы былі ў складзе Польшчы. У час Вялікай Айчыннай вайны Баранавічы былі моцна разбураны і панеслі вялікія страты.
"Таму наш Прэзідэнт і гаворыць, што Вялікая Айчынная вайна для нас не закончылася. І ў рамках справы аб генацыдзе праводзіцца вялізная работа па аднаўленні, захаванні памяці ўсіх бязвінна закатаваных ахвяр. У бягучым годзе наш Прэзідэнт узнагародзіў Баранавічы спецыяльным вымпелам "За мужнасць у гады Вялікай Айчыннай вайны". Сёння на стале ў нашага лідара знаходзяцца матэрыялы аб падачы заяўкі ўжо ў рамках Садружнасці Незалежных Дзяржаў аб прысваенні Баранавічам звання "Горада-героя працоўнай славы ў перыяд Вялікай Айчыннай вайны" за масавы гераізм і самаахвяраванне працаўнікоў тылу горада", - расказаў Дзмітрый Крутой.
Напрыклад, у час вызвалення горада ў Баранавічах за тры дні здолелі аднавіць рух паяздоў у бок Брэста. Пры гэтым фашысты нанеслі чыгуначнай інфраструктуры сур'ёзны ўрон. На прадпрыемстве "Гандальмаш" аператыўна наладзілі выпуск малаткоў, плугоў і іншых тавараў першай неабходнасці і для насельніцтва, і для народнай гаспадаркі. "Такіх прыкладаў няскоранага, нязломнага горада на самай справе дзясяткі. Нам трэба ганарыцца гэтымі подзвігамі", - падкрэсліў кіраўнік Адміністрацыі Прэзідэнта.-0-
Падпісвайцеся на нас у
