14 мая, Магілёўскі раён /Кар. БЕЛТА/. На мемарыяльным комплексе "Буйніцкае поле" дадзены афіцыйны старт трэцяму працоўнаму семестру. Рэспубліканскае мерапрыемства сабрала каля 500 прадстаўнікоў студатрадаўскага руху з усёй Беларусі, перадае БЕЛТА.
У адкрыцці працоўнага семестра прынялі ўдзел байцы, камандзіры, камісары студэнцкіх атрадаў, кіраўнікі працоўных праектаў, ветэраны руху і ганаровыя госці. Юнакоў і дзяўчат вітаў і павіншаваў з гэтай значнай падзеяй кіраўнік Адміністрацыі Прэзідэнта Ігар Сергяенка.
"Традыцыі студэнцкага студатрадаўскага руху развіваюцца і прадаўжаюцца ў нашай краіне, сваімі каранямі яны ідуць амаль у 60-гадовую гісторыю, - адзначыў Ігар Сергяенка. - За гэты час праз студатрадаўскі рух прайшлі сотні, тысячы юнакоў і дзяўчат. Яны атрымалі сур'ёзную працоўную і палітычную загартоўку. Знаходзячыся сёння тут, гледзячы ў іх маладыя і радасныя твары, бачачы сцягі вышэйшых навучальных устаноў, успамінаеш свае студэнцкія дні і студатрадаўскія гады: тое, з якой цікавасцю мы чакалі трэцяга працоўнага семестра. Менавіта дзякуючы ініцыятыве Прэзідэнта ў 2005 годзе гэтыя традыцыі былі адноўлены, і з кожным годам работа студэнцкіх атрадаў у нашай краіне набірае сілу".
Ігар Сергяенка пажадаў юнакам і дзяўчатам працаваць з поўнай аддачай сіл і цаніць праведзены ў струдатрадах час. "Гэта цудоўны час праверыць сябе, атрымаць вопыт, зарабіць першыя грошы і першыя мазалі, - падкрэсліў ён. - Менавіта гэта абстаноўка і атмасфера з'ядноўвае ўсіх нас. Поспехаў вам, добрага здароўя і цікавага правядзення часу".
Удзельнікі мерапрыемства ўсклалі кветкі да чырвонай капліцы, устанавілі на тэрыторыі мемарыяла стылізаваную таблічку з QR-кодам у рамках праекта "Лічбавая зорка". Цэнтральнай падзеяй стала ўрачыстая цырымонія ўручэння зводным студэнцкім атрадам кіраўнікамі органаў дзяржаўнай улады, міністэрстваў і ведамстваў працоўных пуцёвак для работы на абласных і рэспубліканскіх будоўлях, сацыяльна значных аб'ектах краіны, у тым ліку будаўніцтве музея ў ДМК "Хатынь" і рэканструкцыі гэтага комплексу.
Сярод тых, хто сёння атрымаў працоўную пуцёўку, - камандзір студэнцкага будаўнічага атрада "Дойліды" імя Героя Савецкага Саюза П.Блахіна Руслан Маржэўскі, студэнт 3-га курса Полацкага дзяржаўнага ўніверсітэта - будучы інжынер-механік. Яго атрад у канцы чэрвеня накіруецца на работу на Усерасійскую студэнцкую будоўлю "Поўнач" у Якуцію. "Я ўдзельнічаю ў студатрадаўскім руху другі год, і ўпершыню - у якасці камандзіра, - сказаў ён. - У мінулым годзе быў мой першы выезд на грандыёзны праект "Кузбас-300", міжнародную будоўлю. Сабраліся 18 атрадаў з Расіі і ўсяго адзін наш - з Беларусі. Мы там будавалі культурны кластар - харэаграфічную і вакальную школы, інтэрнат, "Кузбас-Арэну" і плошчу каля яе. У першую чаргу мы атрымалі вопыт, пазнаёміліся з новымі людзьмі і, вядома ж, зарабілі грошы".
Як адзначылі ў БРСМ, студатрадаўскі рух стаў адным з вядучых напрамкаў дзейнасці маладзёжнай арганізацыі. Часовае працаўладкаванне ў складзе студэнцкіх атрадаў вырашае не толькі матэрыяльныя інтарэсы, але і павышае сацыяльную актыўнасць маладых людзей, стварае ўмовы для грамадска-карыснай дзейнасці, мае вялікае выхаваўчае значэнне. Візітнай карткай беларускіх атрадаў у краіне і за яе межамі сталі працавітасць, мэтанакіраванасць, адказныя адносіны да справы.
"Сёння кожны малады чалавек павінен разумець, што можа ўнесці сваёй працай уклад у развіццё нашай краіны, - адзначыў міністр адукацыі Андрэй Іванец. - Менавіта таму будатрадаўскі рух - гэта не проста магчымасць праявіць сябе. Студатрадаўскія гады - гэта не толькі працоўныя будні, але і магчымасць завесці новыя знаёмствы, пазнаць адзін аднаго і ўсё гэта ў далейшым рэалізаваць у сваім жыцці. Жадаю ўсім плённай працы на карысць нашай краіны".
Па выніках 2021 года Рэспубліканскі штаб студэнцкіх атрадаў БРСМ працаўладкаваў больш за 34 тыс. чалавек у складзе звыш
2,4 тыс. студэнцкіх атрадаў. Па стане на 1 мая 2022 года ў рамках круглагадовай працоўнай занятасці ў складзе 170 студэнцкіх атрадаў працаўладкаваны амаль 2,83 тыс., прычым больш за 1,6 тыс. з іх - падлеткі. На сёння ўжо больш як 22 тыс. чалавек з усёй краіны падалі заяўкі на работу ў працоўным семестры. Найбольшай папулярнасцю карыстаюцца сэрвісныя, экалагічныя, будаўнічыя і вытворчыя атрады. У іх пададзена больш за ўсё заявак. Масава студэнцкія атрады пачнуць работу з ліпеня бягучага года, пасля здачы экзаменацыйнай сесіі.
У Год гістарычнай памяці месца правядзення ўрачыстай цырымоніі адкрыцця трэцяга працоўнага семестра выбрана невыпадкова. У 1941 годзе на Буйніцкім полі праходзіла лінія савецкай абароны і ішла складаная барацьба за Магілёў. Нямецкія войскі разлічвалі з ходу заняць абласны цэнтр і, наступаючы, накіравалі на Буйніцкае поле 70 танкаў. Асноўны бой доўжыўся 14 гадзін. Савецкім салдатам удалося спаліць 39 танкаў і адбіць некалькі атак. Абарона Магілёва прадаўжалася 23 дні. Буйніцкае поле стала сімвалам адвагі савецкіх салдат.
У 2006 годзе БРСМ правёў рэспубліканскі маладзёжны суботнік. Па ініцыятыве актывістаў саюза, у сувязі з 65-годдзем гераічнай абароны Магілёва ад нямецка-фашысцкіх захопнікаў, сродкі, заробленыя на суботніку, накіраваны на добраўпарадкаванне мемарыяльнага комплексу "Буйніцкае поле". На Алеі абаронцаў горада Магілёва закладзена капсула з пажаданнямі для маладых людзей, якія прыйдуць да мемарыяла ў 100-гадовы юбілей абароны Магілёва ў 2041 годзе.-0-
