18 верасня, Мінск /Кар. БЕЛТА/. Міністэрства транспарту і камунікацый Беларусі выступае за найхутчэйшае аднаўленне міжнародных авіязносін. Аб гэтым заявіў дырэктар Дэпартамента па авіяцыі Мінтранса Арцём Сікорскі на відэаканферэнцыі з удзелам кіраўнікоў ведамстваў грамадзянскай авіяцыі Еўрапейскага/Паўночнаатлантычнага бюро ІКАО (Міжнароднай арганізацыі грамадзянскай авіяцыі), паведамілі БЕЛТА ў прэс-службе міністэрства.
Удзельнікі прадставілі даклады на тэму прымаемых мер па аднаўленні зносін і мінімізацыі наступстваў COVID-19.
Як адзначыў Арцём Сікорскі, у Беларусі прыняты ўсе неабходныя меры ў адпаведнасці з міжнароднымі стандартамі па барацьбе з распаўсюджваннем COVID-19. "Нацыянальная авіяцыйная адміністрацыя Беларусі цалкам падтрымлівае ініцыятывы ІКАО і ІАТА (Міжнародная асацыяцыя паветранага транспарту. - Заўвага БЕЛТА) па найхутчэйшым аднаўленні міжнародных авіязносін", - сказаў ён.
Па выніках відэаканферэнцыі бакі падрыхтуюць справаздачу, якую разгледзяць на наступнай нарадзе.-0-
