12 лістапада, Мінск /Кар. БЕЛТА/. Пералік лекавых прэпаратаў, якія рэалізуюцца без рэцэпта ўрача, выдадзены ў новай рэдакцыі. Адпаведная пастанова Міністэрства аховы здароўя ад 8 лістапада 2021 года нумар 120 афіцыйна апублікавана сёння на Нацыянальным прававым інтэрнэт-партале, паведамляе БЕЛТА.
Пералік дапаўняецца лекавымі прэпаратамі для лячэння шэрага сардэчна-сасудзістых захворванняў, цукровага дыябету, захворванняў шчытападобнай залозы, носа і вачэй, глаўкомы, некаторымі процімікробнымі лекавымі прэпаратамі, гарманальнымі прэпаратамі.
Як растлумачылі ў Міністэрстве аховы здароўя, гэта звязана з тым, што названыя лекавыя прэпараты найбольш часта прымяняюцца ў пажылых пацыентаў і людзей з хранічнымі захворваннямі. Гэта катэгорыя грамадзян уваходзіць у групу рызыкі, паколькі найбольш успрымальна да заражэння COVID-19 і найбольш цяжка пераносіць названае захворванне.
Таксама пералік дапаўняецца лекавымі прэпаратамі, якія зарэгістраваны ў Міністэрстве аховы здароўя з пачатку 2021 года з парадкам рэалізацыі "без рэцэпта ўрача". Лекавыя прэпараты, рэгістрацыйныя пасведчанні на якія скончыліся і якіх больш няма ў продажы, з пераліку выключаны.-0-
