14 мая, Мінск /Кар. БЕЛТА/. Міністэрства абароны праводзіць праверку баявой і мабілізацыйнай гатоўнасці, паведамілі БЕЛТА ва ўстанове.
"У 25-м арсенале ракетна-артылерыйскага ўзбраення пад кіраўніцтвам намесніка міністра абароны па ўзбраенні - начальніка ўзбраення Узброеных Сіл праводзіцца праверка баявой і мабілізацыйнай гатоўнасці. Падчас праверкі з запасу будуць прызваны амаль 170 ваеннаабавязаных для фарміравання асобнага рамонтна-аднаўленчага батальёна", - расказалі ў ведамстве.
Сфарміраваны батальён чакае марш на 227-ы агульнавайсковы палігон. У раёне сканцэнтравання ваеннаслужачыя арганізуюць зборны пункт няспраўных машын. Ім трэба будзе ў палявых умовах адпрацаваць бягучы і сярэдні рамонт узораў узбраення, ваеннай і спецыяльнай тэхнікі злучэнняў і воінскіх часцей Узброеных Сіл.-0-