4 красавіка, Мінск /Кар. БЕЛТА/. Чуткі пра COVID-19 распаўсюджваюцца як вірус і патрабуюць жорсткай рэакцыі. Такое меркаванне карэспандэнту БЕЛТА выказаў старшыня Пастаяннай камісіі па адукацыі, навуцы і культуры Палаты прадстаўнікоў Ігар Марзалюк.
Парламентарый лічыць, што людзі, якія свядома распаўсюджваюць у сацсетках фэйкі пра сітуацыю з каранавірусам, павінны несці за гэта адказнасць. "Самае агіднае, што яны капіталізуюць людскі страх, банальна зарабляюць на ім грошы. Чуткі распаўсюджваюцца як вірус і параджаюць паніку. Процістаяць гэтаму павінны сістэмная работа Міністэрства аховы здароўя ў частцы інфармавання насельніцтва і строгая прынцыповая пазіцыя Мінінфарма. Яна заключаецца ў тым, каб ініцыяваць крымінальныя і адміністрацыйныя справы", - сказаў дэпутат. Заканадаўчыя рычагі для гэтага ёсць, дадаў ён.
"Трэба быць максімальна адкрытымі і аператыўна рэагаваць на любое лжывае паведамленне пра цяжкую сітуацыю ў якім-небудзь рэгіёне ці бальніцы. Пазіцыя Міністэрства аховы здароўя і Мінінфарма павінна быць галоўнай, курыруючай і вызначальнай. Адзіны спосаб проціпаставіць фэйкам - даваць інфармацыю як мага больш і аператыўней", - падкрэсліў парламентарый.
Ігар Марзалюк адзначыў і пазітыўны момант. Так, парламентарый звярнуў увагу, што нягледзячы на распаўсюджванне панічных чутак, беларусы паводзяць сябе як дастойная і кансалідаваная нацыя. "Людзі стараюцца дапамагаць - шыюць маскі, бясплатна возяць урачоў і рыхтуюць ім абеды. Гэтыя рэчы таксама павінны быць у мейнстрыме. Мы павінны паказаць, што мы разам, цэнім адзін аднаго, гатовы кансалідавацца і салідарна прайсці гэты няпросты этап", - рэзюмаваў ён.-0-
