3 чэрвеня, Мінск /Кар. БЕЛТА/. Устанаўліваць мінімальную суму пакупкі ў інтэрнэт-магазіне неправамерна, паведамілі БЕЛТА ў прэс-службе Міністэрства антыманапольнага рэгулявання і гандлю.
"У сетцы распаўсюджваецца інфармацыя аб устанаўленні асобнымі інтэрнэт-прадаўцамі мінімальнай сумы пакупкі для прыняцця заказу ў спажыўца, напрыклад, на набыццё лякарстваў на суму не меншую за Br30. У сувязі з гэтым звяртаем увагу, што ўстанаўленне сумы мінімальнага заказу парушае права пакупніка на свабодны выбар тавару. Такім чынам яго фактычна прымушаюць да заказу прадукцыі, якую ён першапачаткова не планаваў набываць", - сказалі ў прэс-службе. У адпаведнасці з заканадаўствам, умовы дагавора, якія абмяжоўваюць правы спажыўцоў, лічацца нязначнымі.
Адносіны паміж прадаўцамі і пакупнікамі, у тым ліку ў сферы інтэрнэт-гандлю, рэгулююцца законам "Аб абароне правоў спажыўцоў" і правіламі продажу тавараў пры ажыццяўленні рознічнага гандлю па ўзорах, зацверджанымі пастановай Савета Міністраў ад 15 студзеня 2009 года нумар 31. Згодна з законам спажывец мае права на свабодны выбар тавараў належнай якасці ў зручны для яго час з улiкам рэжыму работы інтэрнэт-прадаўца. Акрамя таго, забараняецца абумоўліваць куплю тавару абавязковым набыццём іншай прадукцыі. Страты, нанесеныя спажыўцу ў вынiку парушэння яго права на свабодны выбар тавару, кампенсуюцца прадаўцом у поўным аб'ёме.
Разам з тым прадавец мае права вызначыць умовы бясплатнай дастаўкі. Напрыклад, пры набыцці тавараў на пэўную суму (якую ён устанаўлівае самастойна) іх дастаўка спажыўцу ажыццяўляецца бясплатна.-0-
