17 жніўня, Мінск /Кар. БЕЛТА/. Магазіны з прадукцыяй лясгасаў павінны быць адкрыты ў кожнай вобласці да канца красавіка 2023 года. Аб гэтым заявіў міністр лясной гаспадаркі Аляксандр Кулік падчас нарады ў Дзяржынску, паведамілі БЕЛТА ў прэс-службе Мінлясгаса.
"Гэта павінны быць візітныя карткі ДВЛГА. Проста пунктаў у цэхах або побач з адміністрацыйнымі будынкамі лясгасаў мала. Гэта павінны быць сучасныя аб'екты на выездзе з абласных цэнтраў з шырокім асартыментам выпускаемай лясгасамі прадукцыяй", - падкрэсліў кіраўнік ведамства.
Аляксандр Кулік заклікаў кіраўнікоў лясгасаў выбудаваць сістэмную работу з насельніцтвам, а таксама да наступнай вясны адкрыць у кожнай вобласці сучасныя магазіны з прадукцыяй беларускіх лясгасаў. Арыенцірам павінен стаць рознічны гандлёвы пункт Капыльскага доследнага лясгаса ў Дзяржынску.
Вызначаны і канкрэтны тэрмін: новыя аб'екты павінны пачаць працаваць не пазней за 25 красавіка наступнага года.-0-
