19 кастрычніка, Магілёў /Кар. БЕЛТА/. На дыялогавых пляцоўках абмяркоўваюцца пытанні, якія павінны ўдасканаліць наша жыццё. Такім меркаваннем з журналістамі падзяліўся член Пастаяннай камісіі Савета Рэспублікі па адукацыі, навуцы, культуры і сацыяльным развіцці Ігар Каско ў час работы дыялогавай пляцоўкі, прысвечанай пытанням сацыяльнай сферы. Сустрэча прайшла сёння ў Магілёўскім абласным метадычным цэнтры народнай творчасці і культурна-асветнай работы, перадае карэспандэнт БЕЛТА.
"Сёння на дыялогавай пляцоўцы мы разглядалі сацыяльную сферу жыцця, а гэта ўсё, што акружае чалавека: навука, ахова здароўя, адукацыя, культура, спорт, турызм, экалогія і многае іншае. Кожная наша секцыя разглядала гэтыя пытанні на сваіх мерапрыемствах, якія праходзілі ва ўстановах і адпаведных упраўленнях. Дыскусія ўнутры заўсёды ёсць. І на дыялогавых пляцоўках важна выбраць самыя значныя пытанні, якія, як мы спадзяёмся, лягуць у аснову заканадаўчых актаў і будуць выкарыстаны для ўдасканалення нашага жыцця, - адзначыў Ігар Каско.- Сёння мы пастараліся акумуляваць тыя пытанні, якія патрабуюць не толькі абмеркавання, але і дэталёвай прапрацоўкі. Так, напрыклад, у сферы аховы здароўя, мы абмяркоўвалі пытанні змянення сістэмы фінансавання аховы здароўя, павышэння якасці медыцынскай дапамогі і яе даступнасці, абмеркавалі праблему больш рацыянальнага выкарыстання фінансавання".
Паводле слоў Ігара Каско, у Беларусі створана сістэма аховы здароўя, якая нацэлена на высокія вынікі і паказчыкі. "У нас адзін з самых нізкіх у свеце паказчыкаў дзіцячай смяротнасці, нязначная мацярынская смяротнасць, высокі ўзровень трансплантацыйнай актыўнасці. Ахова здароўя ў Беларусі дасягнула каласальных вынікаў. І цяпер трэба рацыянальна падысці да пытання выкарыстання выдзяляемых фінансавых сродкаў, трэба знайсці залатую сярэдзіну, якая дасць магчымасць аказваць якасныя паслугі і паказваць высокія вынікі работы. Гэта больш эканамічны складнік пытанняў функцыянавання аховы здароўя. Узнімалася пытанне і аб узаемаадносінах прыватнай і дзяржаўнай медыцыны. Прыватная медыцына цяпер развіваецца, і трэба наладзіць механізм узаемадзеяння", - адзначыў Ігар Каско.
Акрамя аховы здароўя, абмяркоўваліся пытанні больш актыўнага ўключэння ў жыццё грамадства людзей з асаблівасцямі. "У Беларусі ўдалося дасягнуць многага для таго, каб дзеці і дарослыя са шматлікімі парушэннямі ў развіцці былі ўключаны ў жыццё грамадства, - адзначыў дырэктар Цэнтра сацыяльнага абслугоўвання насельніцтва Кастрычніцкага раёна Магілёва Андрэй Руцкі. - Аднак па меры сталення такіх людзей многія бацькі фізічна не могуць забяспечыць догляд і суправаджэнне свайму дзіцяці. На гэты час у нас няма альтэрнатывы псіханеўралагічным інтэрнатам. Таму трэба разгледзець магчымасць пражывання людзей з інтэлектуальнымі парушэннямі ва ўмовах звычайнага сацыяльнага асяроддзя, нават калі іх бацькі паміраюць. Такія людзі могуць пражываць самі, ім могуць дапамагаць. Ёсць паслугі суправаджальнага пражывання і асістэнта. Цяпер яны даступны для адзінокіх і адзінока пражываючых інвалідаў 1-й і 2-й груп - не больш за 60 гадзін у месяц. Мы прапануем пашырыць магчымасць аказання такіх паслуг у залежнасці ад ступені страты здольнасці да самастойнага пражывання".
Абмяркоўваліся і пытанні рэфармавання сістэмы адукацыі. З рознымі прапановамі выступіў начальнік галоўнага ўпраўлення адукацыі Магілёўскага аблвыканкама Андрэй Заблоцкі. "Мы абмеркавалі два важныя і ўзаемазвязаныя пытанні: профільнай і прафесійнай адукацыі. Гэта дадатковыя іспыты пасля пачатковай школы, падзел патокаў вучняў пасля 9-га класа. Тыя, у каго вышэйшая паспяховасць, пойдуць у профільны 10-ы клас і далей у ВНУ , а тыя, у каго ніжэйшая, - могуць атрымаць прафесійную адукацыю. Мы цяпер маем патрэбу ў кваліфікаваных спецыялістах рабочых спецыяльнасцей. І ў гэтым напрамку чалавек можа развівацца як прафесіянал, - адзначыў Андрэй Заблоцкі. - Акрамя таго, мы прапануем зрабіць адзіны экзамен пасля 11-га класа - як падагульняючы за ўвесь школьны курс і адначасова як уступны экзамен у ВНУ. Гэта можа быць варыянт ЦТ або любы іншы фармат - у гэтым напрамку яшчэ трэба папрацаваць".
Акрамя таго, Андрэй Заблоцкі падкрэсліў неабходнасць удзяліць асаблівую ўвагу выхаванню будучых грамадзян сваёй краіны. "Цяпер наспела неабходнасць павышэння бацькоўскай адказнасці за выхаванне дзяцей, сумеснай работы настаўніка і бацькоў. Толькі ў такім саюзе можна выхаваць сапраўднага грамадзяніна. Мы прапануем распрацаваць адзіную палітыку, дакладна размежаваць абавязкі сям'і і школы, прапісаць адзіныя падыходы і патрабаванні", - падкрэсліў начальнік галоўнага ўпраўлення па адукацыі Магаблвыканкама.
Усяго ў рабоце дыялогавай пляцоўкі прынялі ўдзел больш за 20 экспертаў.-0-
