26 студзеня, Мінск /Кар. БЕЛТА/. Каля 3,7 млн кв.м жылля плануецца ўвесці ў эксплуатацыю ў Беларусі ў 2023 годзе пасля капітальнага рамонту. Аб гэтым у прэс-цэнтры БЕЛТА расказаў начальнік упраўлення жыллёвай гаспадаркі Міністэрства жыллёва-камунальнай гаспадаркі Андрэй Рамашка.
Пасля капітальнага рамонту плануецца ўводзіць не менш за 3 працэнты эксплуатуемай арганізацыямі ЖКГ плошчы жылых дамоў. Што датычыцца мінулага года, было запланавана 3,6 млн кв.м агульнай плошчы жылля, а выканана крыху больш за 3,375 млн кв.м, што складае 93,2 працэнта ад даведзенага задання. "Крыху недацягнулі да выканання, але ў цэлым па краіне дасягнуты максімальны аб'ём увядзення пасля капітальнага рамонту за апошнія 10 гадоў", - сказаў Андрэй Рамашка.
У бягучым годзе арганізацыі ЖКГ плануюць увесці ў эксплуатацыю каля 3,7 млн кв.м агульнай плошчы жылля па Беларусі, а гэта 1108 аб'ектаў. "Графікі капітальнага рамонту мясцовымі ўладамі ўжо сфарміраваны, а да 1 лютага спісы павінны быць размешчаны ў агульным доступе - у сродках масавай інфармацыі, на сайтах мясцовых выканаўчых і распарадчых органаў, арганізацый ЖКГ. Акрамя таго, у адпаведнасці з пастаўленай задачай па выкананні праектнай дакументацыі на аб'екты, якія знаходзяцца ў такіх графіках, гатова ўжо 83 працэнты дакументацыі, экспертыза пройдзена", - адзначыў начальнік упраўлення.
Паводле яго слоў, асноўная праблема звязана з якасцю і тэрмінамі выканання капітальнага рамонту. "Штогод колькасць аб'ектаў з перавышэннем нарматыўнага тэрміну будаўніцтва змяншаецца. Па выніках 2022 года колькасць такіх аб'ектаў скарацілася з 214 да 13 - дынаміка станоўчая. Разам з тым па бягучых аб'ектах пытанні яшчэ застаюцца актуальнымі. Асноўная прычына парушэння тэрмінаў здачы - нядобрасумленныя падрадчыкі", - растлумачыў спецыяліст.
У снежні 2022 года ўступілі ў сілу змяненні ў закон "Аб абароне правоў спажыўцоў жыллёва-камунальных паслуг", якія дазваляюць мясцовым выканаўчым і распарадчым органам назначаць выканаўцаў будаўніча-мантажных работ па капітальным рамонце без правядзення конкурсу з ліку дзяржаўных арганізацый. "Мяркуецца, што праблема ў частцы парушэння заказчыкамі тэрмінаў і якасці работ будзе або выключана, або мінімізавана", - сказаў на заканчэнне Андрэй Рамашка.-0-
