ДЗЯРЖОРГАНЫДЗЯРЖОРГАНЫ
Флаг Нядзеля, 4 снежня 2022
Мінск Суцэльная воблачнасць -5°C
Усе навіны
Усе навіны
Грамадства
26 верасня 2022, 16:06

Які фармат накапленняў на "другую пенсію" чакаецца як самы запатрабаваны? Меркаванне Мінпрацы

Фота з архіва
Фота з архіва

26 верасня, Мінск /Кар. БЕЛТА/. Фармат, калі 3 працэнты ад налічанай зарплаты работніка ідуць у накапленне дадатковай пенсіі, а яшчэ 3 працэнты выплачвае наймальнік, можа аказацца самым запатрабаваным, паведаміла журналістам першы намеснік міністра працы і сацыяльнай абароны Наталля Паўлючэнка, перадае карэспандэнт БЕЛТА.

Першы намеснік міністра расказала, што ў ходзе работы, праведзенай да ўступлення ў сілу адпаведнага ўказа, было праведзена больш за 7 тыс. сустрэч на прадпрыемствах, у дыялогавых пляцоўках у агульнай колькасці ўдзельнічала больш за мільён працуючых грамадзян.

"Заўсёды хацелася адчуць зваротную сувязь, цікавасць да новай сістэмы, ці пойдуць людзі ў гэту сістэму і наколькі яна будзе запатрабавана. Вядома, гэта пакажа наш вопыт рэалізацыі ўказа, але падчас сустрэч з калектывамі пытанняў было вельмі шмат, - сказала Наталля Паўлючэнка. - Як мы цяпер мяркуем, найбольш запатрабаваны будзе фармат пад назвай "3 плюс 3", калі 3 працэнты ўтрымлівае з заработнай платы чалавек і плюс 3 працэнты пералічвае работадавец. Гэты фармат, зыходзячы з пытанняў калектываў, найбольш запатрабаваны".

Накапленні ў дадатковую пенсію могуць складаць ад 1 працэнта да 10 працэнтаў ад зарплаты работніка і роўны працэнт, але не больш за 3 працэнты, накіруе яго работадавец. Пры гэтым затрачаныя сродкі пакрывае Фонд сацыяльнай абароны насельніцтва, таму гэтыя сродкі дадатковай фінансавай нагрузкі на работадаўцу не нясуць.

Адказваючы на пытанне, у якім памеры чалавек зможа атрымліваць "другую пенсію", гендырэктар дзяржаўнага прадпрыемства "Стравіта" Сяргей Андрыевіч растлумачыў, што сваю ролю адыграе вельмі шмат фактараў, якія ў любым выпадку будуць змяняцца: гэта стаўка рэфінансавання, зарплата чалавека і, магчыма, працэнт яго адлічэнняў, які ён выбраў пры заключэнні дагавора. "Але калі браць на сёння такія ўмоўныя лічбы, як сярэдняя заработная плата Br1,4 тыс . і фармат "3 працэнты на 3 працэнты", стаўку рэфінансавання 12 працэнтаў, то за 10 гадоў знаходжання ў праграме штомесячная дадатковая пенсія на працягу пяці гадоў - у раёне Br300, дзесяці гадоў - Br145. Калі браць 20 гадоў, то Br1,2 тыс. і Br600 у месяц адпаведна. Чым раней стартуеш, тым больш накопіш", - прывёў ён прыклад.

Паводле слоў Наталлі Паўлючэнка, пэўная цікавасць да ўдзелу ў такой сістэме ёсць у людзей сярэдняга і больш старэйшага ўзросту. Разам з тым вітаецца ўдзел і маладых людзей.

Заключаецца адзін дагавор без права яго далейшага скасавання, які распаўсюджвае сваё дзеянне да агульнаўстаноўленага пенсійнага ўзросту. Па жаданні застрахаванай асобы тарыф узносаў можна мяняць штогод. У рамках дзеяння дагавора на любым этапе без абмежавання колькасці раз чалавек можа прыпыніць свой удзел у сістэме і гэтак жа аднавіць пералік страхавых узносаў. Пры гэтым раней унесеныя абавязковыя страхавыя ўзносы прадаўжаюць працаваць, капіталізавацца і пасля дасягнення агульнаўстаноўленага пенсійнага ўзросту будуць выплачаны.

Таксама работніку прадастаўляецца льгота пры вылічэнні падаходнага падатку на суму, якую ў яго ўтрымліваюць з яго заработнай платы для пералічэння ў "Стравіту".

Выплачваць дадатковую пенсію будуць роўнымі долямі на працягу пяці ці дзесяці гадоў па выбары чалавека (гэта пазначаецца ў заяве). Накопленая пенсія з'яўляецца спадчыннай.

У адпаведнасці з указам нумар 367 "Аб добраахвотным страхаванні дадатковай накапляльнай пенсіі" з 1 кастрычніка 2022 года ў краіне ўводзіцца добраахвотнае страхаванне дадатковай накапляльнай пенсіі з фінансавай падтрымкай дзяржавы. З гэтай даты грамадзянін зможа заключыць дагавор, звярнуўшыся або ў офіс "Стравіты", або праз асабісты кабінет карыстальніка афіцыйнага сайта гэтага дзяржпрадпрыемства, прайшоўшы рэгістрацыю. Работадавец будзе абменьвацца інфармацыяй са "Стравітай" з дапамогай агульнадзяржаўнай аўтаматызаванай інфармацыйнай сістэмы. А адносна Фонду сацыяльнай абароны насельніцтва для работадаўца нічога не зменіцца: у будучым, як і сёння, сувязным звяном будзе карпаратыўны партал фонду.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі