Вадзім Гігін
30 лістапада, Віцебск /Кар. БЕЛТА/. Сацыяльна значную літаратуру і сертыфікаты на доступ да рэспубліканскіх электронных рэсурсаў на "Марафоне адзінства" прадстаўнікам бібліятэчнай сістэмы Віцебскай вобласці ўручыў генеральны дырэктар Нацыянальнай бібліятэкі Беларусі Вадзім Гігін, перадае карэспандэнт БЕЛТА.
Віцебская абласная бібліятэка імя У.І.Леніна прыняла праект "Веды без межаў", які праходзіць у рамках рэспубліканскай грамадска-культурнай акцыі "Марафон адзінства". Вадзім Гігін перадаў установе культуры 150 кніг, з якіх 100 адправяцца ў раённыя бібліятэкі.
"Сутнасць акцыі "Веды без межаў" - паказаць адзінства інтэлектуальнае і культурнае нашай краіны праз кнігу, электронныя рэсурсы. У нас ёсць такое паняцце, як "сацыяльна значная літаратура", гэта карысная літаратура, важная, патрэбная, актуальная, якая выпускаецца нашымі выдавецтвамі, паступае ў бібліятэкі. Нацыянальная бібліятэка збірае такую літаратуру, дзеліцца ёю. Вельмі важна, што гэта расстаноўка акцэнтаў, неабходных цяпер у ідэалогіі, адукацыі, культуры. Гэта кнігі аб Вялікай Айчыннай вайне, генацыдзе беларускага народа, які праводзілі акупанты, аб нашых партызанах, падпольшчыках, аб сучаснай Беларусі", - расказаў Вадзім Гігін.
Ён дадаў, што сярод выданняў ёсць кнігі, звязаныя з Віцебшчынай, і ў кожнай акцыі ўлічваецца рэгіянальная спецыфіка. "Гэта расстаноўка арыенціраў, прыярытэтаў, дзякуючы чаму мы можам выбудоўваць выхаваўчую работу", - падкрэсліў гендырэктар Нацбібліятэкі.
Таксама раённым бібліятэкам Вадзім Гігін уручыў сертыфікаты на доступ да электронных рэсурсаў галоўнай бібліятэкі Беларусі. У Нацыянальнай бібліятэкі ёсць вялікі збор алічбаваных дакументаў - каля 700 тыс., для агульнага доступу прадастаўлена каля 130 тыс. выданняў. Цяпер жыхары раёна змогуць атрымліваць доступ да іх, загадзя даведвацца, ці ёсць у Нацбібліятэцы той ці іншы экзэмпляр і заказаць яго. Такім чынам, веды становяцца бліжэй і даступней для больш шырокага кола чытачоў.-0-
Падпісвайцеся на нас у
