23 лістапада, Мінск /Кар. БЕЛТА/. Апошнім часам узрасла колькасць проціпраўных дзеянняў, якія парушаюць стабільную работу чыгуначнага транспарту, паведамляе БЕЛТА са спасылкай на старшага пракурора ўпраўлення па наглядзе за выкананнем заканадаўства на транспарце і ў мытных органах Генеральнай пракуратуры Беларусі Арцёма Маймусава.
Ён адзначыў, што правапарушальнікі прыводзілі ў непрыдатны для эксплуатацыі стан чыгуначныя пуці зносін: замыкалі рэйкавыя ланцугі, пашкоджвалі святлафоры і іншае абсталяванне, размяшчалі прадметы па шляху руху поезда. "Гэта стварала небяспеку гібелі людзей, прычынення ім цялесных пашкоджанняў, аварый і крушэнняў. Такія дзеянні мелі на мэце дэстабілізаваць грамадскі парадак у дзяржаве", - сказаў Арцём Маймусаў.
Органы пракуратуры і Следчага камітэта па гэтых фактах узбудзілі крымінальныя справы. Устаноўлены падазроныя ў такіх злачынствах. Ім пагражае строгае пакаранне - аж да 15 гадоў пазбаўлення волі.-0-