Іван Эйсмант
30 лістапада, Віцебск /Кар. БЕЛТА/. У рамках рэспубліканскай грамадска-культурнай акцыі "Марафон адзінства" ў віцебскім ГЦ "ТРЫА" прайшла "Знакавая сустрэча". На дыскусійнай пляцоўцы сабраліся старшыня Белтэлерадыёкампаніі Іван Эйсмант, генеральны дырэктар БЕЛТА Ірына Акуловіч, а таксама галоўны рэдактар "Альфа Радыё" Вадзім Шэпет, перадае карэспандэнт БЕЛТА.
Тэма сустрэчы - "Крыніцы інфармацыі: каму давяраць?" У нефармальнай абстаноўцы спікеры растлумачылі, як не папасціся на інфармацыйныя фэйкі і адказалі на пытанні, якія хвалявалі прысутных.
Іван Эйсмант расказаў пра тэндэнцыі развіцця медыяпрасторы. "Раней былі інтэрнэт, радыё, тэлебачанне. У наш час важна аператыўнасць падачы інфармацыі, як у інтэрнэце. Акрамя таго, цяпер усё змяшалася. Напрыклад, на радыё практычна кожная студыя абсталявана відэакамерай", - адзначыў ён.
Далей старшыня Белтэлерадыёкампаніі паказаў канкрэтныя прыклады фэйкаў, якія распаўсюджваюць экстрэмісцкія інфармацыйныя рэсурсы. Іван Эйсмант прадэманстраваў ілжывыя навіны пра яго самога і пра Белтэлерадыёкампанію. "Ёсць людзі, якія паддаюцца на дэзынфармацыю. Наступствы могуць быць і на бытавым, і на дзяржаўным узроўнях. Што датычыцца дзяржаўнага ўзроўню, вы памятаеце праславуты 2020 год, калі дэструктыўныя медыя стракацелі загалоўкамі аб тым, што ўсе дзяржаўныя органы нібыта спынілі сваю работу. На бытавым узроўні цяпер таксама вельмі шмат дэзынфармацыі. Асабліва, што датычыцца махлярства ў інтэрнэце: удзел у розыгрышах, атрыманне прызоў. Дзясяткі, сотні, тысячы долараў украдзены. І ўсё з-за таго, што чалавек не знайшоў 15 секунд, каб пераправерыць інфармацыю", - дадаў Іван Эйсмант.
Ён таксама адзначыў, што зарэгістраваныя СМІ складана выкарыстаць для дэзынфармацыі, таму што іх дзейнасць строга рэгулюецца законам. "Што датычыцца іншых крыніц, у тым ліку ў інтэрнэце, - сёння гэта нярэдка цэлая індустрыя, якая стварае фэйкавую інфармацыю. Чытайце ўсё, акрамя забароненых законам СМІ, але рабіце правільныя высновы", - падкрэсліў старшыня Белтэлерадыёкампаніі.
Далей быў праведзены эксперымент. Два добраахвотнікі з ліку гасцей мерапрыемства маглі адчуць сябе тэлеэкспертамі, якія каменціруюць навіну. Таксама была праведзена віктарына з падарункамі.
Пасля госці мерапрыемства задалі пытанні спікерам. Іван Эйсмант адказаў на пытанне аб тым, ці варта абмяжоўваць прысутнасць дзяцей у інтэрнэце, забараняць ім весці акаўнты ў сацыяльных сетках. "Мне здаецца, што трэба з дзецьмі размаўляць. У першую чаргу - у сям'і. Трэба прывіваць інтэрнэт-культуру. Лепш не забараняць ім, гэта нічога не дасць", - упэўнены старшыня Белтэлерадыёкампаніі.
Прысутных на дыскусійнай пляцоўцы гледачоў цікавілі пытанні дзейнасці блогераў, пачатку журналісцкай кар'еры, правільнага арыентавання ў інфармацыйным патоку і многія іншыя.-0-
Падпісвайцеся на нас у
