20 мая, Мінск /Кар. БЕЛТА/. З пачатку тыдня колькасць фур, якія чакаюць уезду ў Польшчу і Літву, вырасла амаль на 60 працэнтаў. Аб гэтым БЕЛТА паведамілі ў Дзяржпагранкамітэце.
Асноўнай прычынай істотнага павелічэння колькасці транспарту з'яўляецца невыкананне Літвой і Польшчай двухбаковых дамоўленасцей па пропуску велікагрузаў.
Так, з панядзелка праз літоўскія пагранічныя пераходы "Лаварышкес" ("Катлоўка"), "Мядзінінкай" ("Каменны Лог"), "Шальчынінкай" ("Беняконі") і "Райгардас" ("Прывалка") у краіны ЕС уехала ўсяго 39,4 працэнта велікагрузаў ад нормы, а праз польскі пункт пропуску "Баброўнікі" ("Бераставіца") - менш за 33 працэнты.
Таксама на літоўскім баку прадаўжае фіксавацца чарга велікагрузаў праз "Мядзінінкай" ("Каменны Лог") і "Шальчынінкай" ("Беняконі"). За мінулыя суткі кантрольныя службы гэтых сумежных пунктаў пропуску аформілі на выезд у нашу краіну 50 працэнтаў фур ад нормы.-0-
