9 лістапада, Мінск /Кар. БЕЛТА/. Дзяржаўтаінспекцыя заклікае вадзіцеляў быць максімальна ўважлівымі ў час руху ў тумане, паведамілі БЕЛТА ва УДАІ МУС Беларусі.
Апошнія два дні дарожную абстаноўку ўскладняе густы туман. Сёння ж да ночы сіноптыкі прагназуюць па ўсёй краіне паніжэнне тэмпературы паветра да мінусавых значэнняў, у сувязі з чым на асобных участках дарог магчыма раптоўнае ўтварэнне галалёдзіцы. "Дзяржаўтаінспекцыя заклікае аўтамабілістаў быць максімальна ўважлівымі. Трэба выбіраць скорасць, зыходзячы са стану праезнай часткі і канкрэтнай сітуацыі на дарозе, іншым разам яна можа не перавышаць і 20 км/гадз. Каб пазбегнуць спадарожнага сутыкнення трэба захоўваць дыстанцыю, а лепш павялічыць яе, - рэкамендуюць у ДАІ. - Не лішнім будзе пазбягаць рэзкіх манеўраў і тармажэння, павысіць пільнасць пры праездзе пешаходных пераходаў. Пры гэтым усе, хто сядзіць у аўтамабілі, павінны быць прышпілены".
У туманнае надвор'е важна забяспечыць добры агляд і быць прыкметнымі для іншых удзельнікаў дарожнага руху. Для гэтага неабходна перамяшчацца з уключаным блізкім святлом фар, перад паездкай ачышчаць шкло і светлавыя прыборы.
Пешаходы ж павінны памятаць, што на слізкай дарозе ў разы павялічваецца тармазны і прыпыначны шлях любой машыны. Пры экстранным тармажэнні аўтамабіль можа пайсці ў некіруемы занос. У сувязі з гэтым пешаходам не трэба рызыкаваць уласнай бяспекай - неабходна пераходзіць дарогу ва ўстаноўленых месцах, і толькі пераканаўшыся, што ўсе аўтамабілі паспелі спыніцца. Ва ўмовах недастатковай бачнасці трэба абазначаць сябе святловяртальнымі элементамі - яны дапамагаюць вадзіцелю своечасова заўважыць чалавека на праезнай частцы.-0-
